Абыройы артқан «айбындықтар»

Маусым айының 17-23 күндері Қарағанды облысындағы Спасск оқу орталығында «Айбын» IX халықаралық әскери-патриоттық жастар жиыны өтті. Облыс әкімі Нұрлыбек Машбекұлы Нәлібаевтың тікелей қолдауымен аймағымыздың жалындаған патриот жастары «Айбын» IX халықаралық әскери-патриоттық сайысына қатысып, аймақ абыройын үстем етті. Еліміздің 20 өңірі мен Өзбекстан, Әзірбайжан мемлекеттерінен жиналған кіл мықтының ішінен озып шығу оңай болмады. Аталған жиынға Қызылорда облысының атынан «Сыр айбыны» құрама командасы қатысып, аймақ намысын қорғады. Онда жастар әскери-қолданбалы спорт түрлерінен, плащ түріндегі жалпы әскери қорғаныс жинағы мен газқағарды уақытқа кию, әскерилендірілген эстафета және АК-74 автоматын толық емес шашу мен жинақтау сынды нормативтерді орындады. Сонымен бірге олар интеллектуалдық және шығармашылық қабілеттерін де ортаға салды.

Бір аптаға жалғасқан жарыста жыл сайын жүлделі орынды еншілеп жүрген қызылордалық өрендер биыл да биіктен көрініп, командалық есепте «Сыр айбыны» құрама командасы бірінші орынға ие болды. Командаға аралдық, №13 орта мектептің алғашқы әскери дайындық пәнінің мұғалімі Өтегенов Ақылбек және қызылордалық №5 мектеп-лицей АӘД пән мұғалімі Валиев Вахит жетекшілік етті.

Команда құрамында аралдық өрендержеңіс тұғырынан көрініп, аудан мерейін асқақтатты. Олар: №231 орта мектеп оқушысы Аманқұлов Мейірбек Қадыржанұлы, №2 облыстық мамандандырылған мектеп-лицей интернатының оқушылары Қайырлаев Берекет Нұрланұлы мен Мырзабекова Аяулым Балтабайқызы және №57 орта мектеп оқушысы Сауренова Диана Нұрбекқызы. Айта кетерлігі, аралдық жастардың осындай жетістікке жетуінде өскелең ұрпақты отаншылдыққа тәрбиелеп, биік мақсаттарға жетелеу жолында қажырлы еңбек еткен аудан мектептеріндегі алғашқы әскери дайындық пәні оқытушыларының үлесі зор, еңбегі өлшеусіз.

Жеңімпаз жас сарбаздарымыз Алғыс хаттармен және бағалы сыйлықтармен марапатталды. Жеңіс құтты болсын, жас өрендер, алдағы уақытта да биік белестерді бағындыра берулеріңізге тілектестпіз!

«Толқын» ақпарат