Қаланы гүлмен көмкерген

Мемлекет басшысы Қасым-Жомарт Тоқаев «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Шын мәнінде, ең бастысы – адал еңбек. Біз мұны жете түсінетін ұрпақ тәрбиелеуге тиіспіз» деген болатын. Расында біздің арамызда да өз кәсібін сүйіспеншілікпен атқарып, адал еңбектің нәпақасын тауып жүрген жандар бар. Солардың бірі – Сарагүл Омарова. Ол қаланы көркейту жұмыстарына атсалысып, ажарын әсем гүлмен айшықтап жүр.
Сарагүл Омарова 1968 жылы Ақбасты елді мекенінде қарапайым балықшы отбасында өмірге келген. Жастайынан әке-шешесі балаларын адал еңбекке баулып өсіреді. Сонысынан болар, буыны қатайған шақтан бастап ол әртүрлі салада табанды еңбек ете бастайды.
– Ес білгелі еңбекке араласып келемін. Жұмыс талғаған емеспін. Кәсіппен де айналыстым. Қолдан келетін тірліктен қашқан емеспін. 2008 жылдан бастап қоғамдық негізде еңбек ете бастадым. Қаланың тазалығы, көркейту-көгалдандыру жұмыстары жүктелді. Өзім бұрыннан гүл өсіргенді жақсы көремін. Бұл менің тіпті сүйікті ісіме айналды. Қаланың белгіленген аймақтарына неше түрлі гүл еге бастадым. Өздеріңіз білетіндей бізде аяқ су мәселесі бар. Сол еккен гүлдерім нәтижеге жету үшін күні-түні уақытпен санаспай еңбек еттім. Осылай жұмысым нәтиже берді, – деген Сарагүл Омарова өзінің еңбек жолы туралы айтты.
Рас, қаланың қай жерінен жайқалған гүл көре қалсаңыз, оның бәрі осы Сарагүл апайдың қолымен отырғызып, күтіп баптаған гүлдері. Қазіргі күні қоғамдық негізде еңбек ететін 85 адамның жұмысын бақылап, басшылық қызмет атқарады. Күнделікті таңертең 8.00-де орталық алаңда жиналған еңбеккерлерді түгелдеп, жұмыстарын бөліп беріп отыру Сарагүл Омарованың міндеті.
– Өзіме жұмысым ұнайды. Қасымда көмекші қыз-жігіттер бар. Олардың бәрі адал еңбекпен бала өсіріп отырған қарапайым адамдар. Қаланың ішіндегі қоқыстарды тазалаймыз, гүлдерді күтіп-баптаймыз. Биыл қаланың 6 аймағына гүл отырғызылды. Көбіне біздің өңір жаз мезгілінде шамадан тыс ыстық болатындықтан көп гүлдер шыдас бере алмайды. Сол себепті табиғатымызға сай келетін гүлдер отырғызамыз. Биыл еккен гүлдің бәрі де жайқалып шығып, еңбек ақталды, – дейді ол.Дегенмен тазалық пен әсемдікті ұштастыру жолында еңбек етіп жүрген кейіпкерімізді қынжылтатын жағдай да жоқ емес. Ол тұрғындардың мәдениетінің төмендігі. Гүлдерді жұлып, көшені қоқысқа толтырып кететіндігіне өкпелі. Қаншама жасалған жұмыстар көзге көрінбей қалып жататыны да сондықтан дейді ол.Сарагүл Омарованың 15 жылдық адал еңбегін ескеріп, Арал қаласы әкімшілігі өткен жылы Меркедегі шипажайға жолдама берген. Бірнеше мәрте облыс, аудан әкімінің мақтау қағаздарымен марапатталып жүр.
Сүйікті ісін кәсібіне айналдырып, қаланың ажарлы келбетін келтіруге атсалысып жүрген Сарагүл Омарова көше комитеті ретінде де халықтың мәселесін шешуге септігін тигізіп жүр. Кейіпкеріміз қарапайым болмысы мен адал еңбегінің арқасында халықтың сүйіктісіне айналып отыр. Қаланың қай қалтарысында жайқалған гүл көрген адам «Сарагүлдің гүлдері ғой» деп тақыр жерге сұлулық сыйлап тұрған еңбекке сүйсіне қарайды. Кейіпкеріміз үшін де содан асқан мақтау мен марапат керек емес. Ел еңбегін ескерсе болғаны.

Назерке БАҚЫРАН