Денсаулыққа қасақана ауыр зиян келтіргені үшін бас бостандығынан айырылды

Арал аудандық сотында Қазақстан Республикасының Қылмыстық Кодексінің 106-бабының 3-бөлігімен айыпталған Р-ның қылмыстық ісі қаралып, айыптау үкімі шығарылды.Сотталушы Р. сот үкімімен төмендегідей қылмыс жасағаны үшін айыпты деп танылған. Атап айтқанда ол, көлігімен танысы Д-ның жанына тоқтаған кезде, соңғының бамперіне аяғын тірегеніне өшігіп, оны көлігімен сырт көзден таса жерге апарып, қолына ала келген темір доғал затпен басынан күштеп ұрып, жерге құлаған оны жұдырығымен бетінен және кеудесінен бірнеше рет ұрып, денсаулығына қасақана ауыр зиян келтiрген. Нәтижесінде жәбірленуші Д. алған ауыр жарақат салдарынан ауруханада көз жұмған.
Сотталушының қылмыстық іс-әрекеті оқиға орнын қарап тексеру хаттамасымен, беттестіру және айғақтарды оқиға орнында нақтылап тергеп тексеру хаттамаларымен, куәлардың жауаптарымен, сараптама қорытындыларымен және іс бойынша басқа да дәлелдемелер жиынтығымен дәлелденген.
Сот үкімімен Р. Қазақстан Республикасының Қылмыстық Кодексінің 106-бабының 3-бөлігімен кінәлі деп танылып, 8 жыл мерзімге бас бостандығынан айыру жазасы тағайындалған.
Үкім заңды күшіне енбеген.
Арал аудандық соты

Фото: elorda.info