Текті сөздің төресі
Қалалық №3 кітапханада ауданымызға белгілі термеші Рысбек Әшімовтің туғанына 70 жыл толуына орай «Текті сөздің төресі» атты еске алу кеші өтті. Шараға Мәдениет саласының ардагері Төребеков Жақсыбай, Сатаева Ранай, «Арал аудандық архив» филиалының қойма меңгерушісі Қ.Арынғазиев, шәкірті Жұбаниязов Серікқали, «Рысбек Әшімов» атындағы жыр-терме үйірмесінің жетекшісі Лиза Жаханқызы мен шәкірттері мен кітапхана оқырмандары қатысты.Мәдениет саласының ардагері Төребеков Жақсыбай қатысып:
–Дәстүрлі орындаушылық өнерде өзіндік үнін қалыптастырып, тыңдаушысын тәнті еткен сұңғыла жыршы Рысбек Әшімов ұлттық өнердің өркен жаюына зор үлес қосты. Осындай белгілі тұлғалар есімін ұлықтап, асыл мұраларымызды бүкіл елге паш ету мақсатында және рухани мұрамызды молайту жолындағы игі істеріңіз сәтімен болғай, – деп, ізгі лебізін арнады.
Шарада термешінің шәкірті Серікқали Жұбаниязов «Аралым айдың шалқарым», «Рысбек Әшімов» атындағы жыр-терме үйірмесінің мүшелері «Жігіттерге өсиет», «Бір-біріне қонақсын» атты термелер орындады.
Шара соңында «Рухты жырдың-Рысбегі» атты кітап көрмесіне, «Арал аудандық архив» филиалының қойма меңгерушісі Қ.Арынғазиев, библиографиялық шолу жасады. Шара Нұртуғанның Кенжеғұлұлының «Кәнекей тілім сөйлеші» термесімен тәмамдалып, оқырмандар алғыс хатпен марапатталды.
К. ЗДЕНОВА
