КЕНТТІКТЕР КӨПТЕН КҮТКЕН КҮН

Кеше мемлекет басшысы Қасым-Жомарт Тоқаевтың Қазақстан халқына Жолдауын асыға күттік. Жыл сайын маңызды қадамдарды көрсетіп, мемлекет дамуына негізделген жұмыстарды жүктейтін Жолдаудан күтеріміз көп болды. Ойлағанымыздай өзекті мәселелерді қамтыған «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында ел дамуының жаңа сатыға қадам басқанымыз белгілі болды.

Әсіресе барша аралдықтарды, соның ішінде Сексеуіл кенті тұрғындарының қуанышы еселене түсті. Жолдауда «Қазір елімізде 13 мың шақырым автокөлік жолдары салынып, жөнделіп жатыр. Жол салған кезде транзиттік дәліздердің мән-маңызына баса көңіл аударған жөн. «Сексеуіл-Бейнеу» жолының құрылысын тездету керек. Осы жолдың арқасында Қазақстан аумағы арқылы Қытайдан Еуропаға жүк тасымалдау мерзімінің үштен бірі қысқарады» деген Президент сөзі көптен бері айтылып келе жатқан жолдың мәселесіне нақты шешім қабылданғанын көрсетті.
Иә, кент тұрғындары осы мәселе жайында жиі айтып, халықтың үні жоғарыға жеткен болатын. Бұл жол құрылысы толық аяқталса тек жүк тасымалы ғана шешімін тауып қоймай, аудан орталығынан шалғайда жатқан ауылдар да қатынас қиындығынан құтылатын болмақ. Ал қазірдің өзінде тоғыз жолдың торабына баланған Сексеуілдің дамуы еселеп арта түсетіні сөз.
Тапсырма берілді, енді ақжолтай жаңалықтың жемісін көрер күн де алыс емес.

Еркебұлан АЯҒАНОВ,
Аудандық мәслихат депутаты,
Сексеуіл локомотив пайдалану депосы бастығының өндіріс
жөніндегі орынбасары

Қоғам

09 қыркүйек 2025 ж. 141 0