Сыбайлас жемқорлықпен күрес – тұрақты дамудың кепілі
Сыбайлас жемқорлық – қоғамның әлеуметтік-экономикалық дамуына кедергі келтіретін, мемлекеттік билікке деген сенімге нұқсан келтіретін аса қауіпті құбылыс. Ол әділеттілік қағидаттарын бұзып қана қоймай, азаматтардың құқықтары мен бостандықтарының толық жүзеге асуына кедергі жасайды. Осыған байланысты жемқорлықпен күрес жүргізу – мемлекеттің стратегиялық бағыты әрі қоғамның ортақ міндеті болып табылады.Қазақстанда сыбайлас жемқорлыққа қарсы саясат дәйекті түрде жүргізіліп келеді. Соңғы жылдары бірқатар нақты қадамдар жасалды:
«Ашық бюджет» жобасы арқылы мемлекеттік қаражаттың жұмсалуы туралы ақпарат көпшілікке қолжетімді болды. Бұл қаражаттың мақсатсыз пайдаланылуын болдырмауға септігін тигізеді.Электронды үкімет пен цифрландыру жүйесі азамат пен мемлекеттік қызметші арасындағы тікелей байланысты азайтып, сыбайлас жемқорлық тәуекелдерін төмендетуге ықпал етті.
Мемлекеттік сатып алу порталында ашық тендерлер өткізілуі бизнес өкілдеріне тең мүмкіндік беріп, әділ бәсекелестікті нығайтуға жағдай жасады.
Сонымен қатар, жемқорлықпен күресте қоғамдық бақылау ерекше рөл атқарады. Азаматтардың «Ашық НҚА» порталында заң жобаларына өз пікірін білдіру мүмкіндігі халықтың шешім қабылдау процесіне қатысуын арттырды.
Сыбайлас жемқорлықпен күрес – тек мемлекеттік органдардың міндеті емес, бүкіл қоғамның ортақ ісі. Мемлекеттік басқарудағы ашықтық пен әділдік, азаматтардың белсенділігі, жастардың адалдыққа тәрбиеленуі – осының барлығы еліміздің тұрақты дамуы мен болашағының кепілі болып табылады.
А. Кеншімбаев,
Қосаман ауылдық округінің әкімі
