Дәрігер күзде күн сайын сәбіз шырынын ішуге 5 себеп атады

Күзде жаңа жиналған сәбізден шырын сығып ішу - кеңестік дәуірден қалған пайдалы дәстүр. Сәбіз - қарапайым әрі арзан көкөніс. Ал оның шырыны - пайдалы заттарға бай табиғи "коктейль". Терапевт әрі нутрициолог Елена Шураева "Доктор Питер" порталына берген сұхбатында сәбіз шырынын ішудің 5 негізгі пайдасын түсіндірді, - деп хабарлайды Massaget.kz тілшісі.

1. Көзге пайдалы

150 мл сәбіз шырынында күніне қажетті бета-каротин мөлшері бар. Бұл зат бауырда ретинолға (А витамині) айналып, көздің қараңғыда көруін жақсартады және "түнде көз көрмей қалудан" алдын алады.

2. Табиғи SPF

Сәбіз құрамындағы каротиноидтар теріде жиналып, ультракүлгін сәуленің әсерін 10-15 пайызға азайтады. Яғни, күнге күйіп қалу қаупі төмендейді.

3. Қабынуға қарсы әсер

Сәбізде фалькаринол деген табиғи зат бар, ол ағзадағы қабыну тудыратын процестерді бәсеңдетеді. Кей зерттеулерде оның ішек ісігі жасушаларының өсуін баяулататыны дәлелденген.

4. Жүрекке пайдалы

Бір стақан сәбіз шырынында 500 мг калий бар. Калий - ағзадағы артық тұзды шығарып, қан қысымын орта есеппен 3-4 мм сынап бағанасына дейін төмендететін табиғи "реттеуші".

5. Бауырды тазартады

Сәбіз шырынында аз болса да пектин бар. Ол бауырды жеңілдетіп, өт қышқылдарын байланыстырады және "жаман" холестеринді азайтады.

Қашан және қалай ішу керек?

Дәрігердің айтуынша, ересек адамға тәулігіне 250-300 мл (бір стақандай) жеткілікті.

    "Таңертең және түстен кейін ішуге болады, бірақ ашқарынға емес, сәбіз шырынының қышқылы мен фруктозасы асқазанға әсер етуі мүмкін", - дейді Шураева.

Шырынды жаңа дайындалған күйінде, 15 минут ішінде ішу қажет. Көп күтсеңіз, пайдалы антиоксиданттар жойылады.

Каротиноидтардың жақсы сіңуі үшін шырынға аздап май қосқан жөн:

    бір шай қасық зәйтүн майы немесе кокос майы;

    жаңғақтармен немесе авокадо қосылған тостпен ішуге болады;

    алма мен балдыркөк шырынымен араластырса, С витамині қосылып, әсері күшейеді;

    зімбір қосу да пайдалы, ол қабынуға қарсы әсерін арттырады.

Кімдерге болмайды?

Сәбіз шырыны пайдалы болғанымен, оны шектен тыс ішуге болмайды.

    "Апталап күн сайын бірнеше стақан ішсеңіз, теріңіз сарғыш тартып, "мандарин түсіне" енуі мүмкін. Бұл зиян емес, бірақ қорқынышты көрінеді. Ал тым көп ішкенде гипервитаминоз A туындауы ықтимал", - дейді дәрігер.

Шураеваның айтуынша, келесі жағдайда шырынды шектеу немесе мүлде ішпеу керек:

    инсулинге төзімсіздік - 250 мл шырында шамамен 12 г қант бар;

    қант диабетінің ауыр түрі - алдымен глюкозаны тұрақтандыру қажет;

    жоғары қышқылды гастрит және асқазан жарасы - қышқылдықты күшейтуі мүмкін;

    өт-тас ауруы (тас 1 см-ден үлкен болса) - шырын өт айдауды күшейтеді;

    қайың не жусан тозаңына аллергиясы барлар - сәбізбен айқаспалы реакция болуы мүмкін.

    "Бір стақан жаңа сығылған сәбіз шырыны - көру қабілетін, тері мен қан тамырларын қолдаудың тамаша жолы. Тек шамадан аспай, май қосып және өз ағзаңыздың ерекшелігін ескеріп ішіңіз", - деп қорытындылады дәрігер Елена Шураева.

Фото: massaget.kz