Енді банктер қарыз алушыға барлық комиссияны ашып көрсетуге міндеттеледі

Енді несие рәсімдеуге ниетті қазақстандықтар артық төлем нақты қанша сома болатынын алдын ала біле алады, - деп хабарлайды Massaget.kz тілшісі Информбюро 31-ге сілтеме жасап. 

Себебі банктер қарыз алушыға барлық комиссиясын ашып көрсетуге міндеттеліп отыр. Яғни, қаржы ұйымдары сайтында не мобильді қосымшасында онлайн калькулятор орналастырады. Ал тұтынушы несие алмас бұрын, керек сомасын жазып, сыйақы мен өзге де алымдар қосылғандағы несие құнын көреді.

Сәйкесінше, соған қарай шешім қабылдауы шарт. Банктер мен микроқаржы ұйымдары тек өздеріне оңтайлы тағы бір тетіктен айырылғалы отыр. Өйткені бұдан былай жылдық тиімді сыйақы мөлшерлемесін анық әрі қанық бояумен жазуға міндетті.

    "Яғни, шартта әдеттегі ұсақ қаріптер емес, бір қарағанда көзге ілінетін сандар тұрады. Бұл тәртіп сайт пен мобильді қосымшаларындағы жарияланым, жарнамаларына да қатысты болмақ. Бастысы, банктер несие құнын алдын ала білуге мүмкіндік беретін онлайн-есептегіш ұсынуға тиіс. Сәйкесінше, әр тұтынушы барлық алым қосылғандағы артық төлемді өз бетінше тексереді. Бұл талап тұтынушылардың құқығын қорғауға ықпал етеді", – деді Қаржы нарығын реттеу және дамыту агенттігінің өкілдері.

Әрі қаржы қызмет шарттарының ашықтығы артпақ. 

    "Тұтынушы қарызды рәсімдемес бұрын, оның толық құнын алдын ала көріп, шешім қабылдайды. Жеке және заңды тұлғаларға арналған қарыздар бойынша жылдық тиімді сыйақы мөлшерлемесі есебіне қарызды беру мен қызмет көрсетуге байланысты комиссиялар мен өзге де төлемдер, сондай-ақ, сақтандыру компанияларының, кепіл берушілердің, бағалаушылардың және делдалдардың кредит беру шарттарына әсер етсе, олар міндетті түрде көрсетілуіге тиіс", - деді Қаржы нарығын реттеу және дамыту агенттігінің баспасөз хатшысы Олжас Рамзанов. 

Яғни, агенттік қаржы нарығында ақпаратты жариялаудың бірыңғай стандартын қалыптастыруды көздеп отыр. Осылайша, енді жылдық тиімді сыйақы мөлшерлемесі қарызды беру мен қызмет көрсетуге қатысты барлық комиссияны біріктірмек. Оның ішіне несие есебінен өтелетін сақтандыру төлемдері кіреді.

Айта кетейік, өзгерістер 18 қазанда күшіне енбек.

Фото: Нұрболат Нұржаубай