Қауіптің алдын алу – ортақ міндет

Жасыратыны жоқ, жаһандану дәуірінде ақпараттың таралу жылдамдығы бұрын-соңды болмаған деңгейге жетті. Интернет пен әлеуметтік желілер адамдардың білім алуына және қарым-қатынас жасауына кең мүмкіндік бергенімен, теріс идеологиялардың таралуына да жол ашып отыр. Солардың бірі – діни экстремизм. Бұл құбылыс қоғамның бірлігіне сызат түсіріп, азаматтардың қауіпсіздігіне қатер төндіретін күрделі мәселе болып тұрғаны жасырын емес.

Діни экстремизм – дінді өз мүддесіне пайдаланатын, қоғамдағы қалыптасқан заңдар мен құндылықтарды мойындамайтын радикалды көзқарастар жиынтығы. Экстремистік топтар өз идеологияларын тарату үшін адамдардың сенімін пайдаланып, оларды заңсыз әрекеттерге итермелеуі мүмкін. Мұндай ағымдардың басты мақсаты – қоғамда тұрақсыздық туғызу, адамдар арасында алауыздық қалыптастыру және өз көзқарастарын күшпен таңу.

Әсіресе жастар экстремистік идеялардың ықпалына жиі ұшырауда. Себебі жасөспірімдер мен жастар жаңа ақпаратқа қызығушылық танытып, өмірлік ұстанымдарын қалыптастыру кезеңінен өтеді. Кей жағдайда діни білімнің жеткіліксіздігі немесе жалған ақпаратқа сену олардың қателесуіне себеп болуы мүмкін. Сондықтан жастардың сыни ойлау қабілетін дамыту, оларды дұрыс ақпаратпен қамтамасыз ету және сапалы білім беруді – экстремизмнің алдын алудың маңызды тетіктері деп қараған абзал.

Қазақстан Республикасы ұлтаралық және конфессияаралық келісімді басты құндылықтардың бірі ретінде қарастырады. Елімізде әр азаматтың діни сенім бостандығына құқығы бар. Сонымен қатар мемлекет заңсыз діни ұйымдардың қызметіне, радикалды идеялардың таралуына және экстремистік әрекеттерге қатаң тосқауыл қояды. Бұл шаралар қоғамдағы бейбітшілік пен тұрақтылықты сақтау мақсатында жүзеге асырылады.

Діни экстремизмге қарсы күресте отбасының орны ерекше. Ата-аналар балаларының тәрбиесіне көңіл бөліп, олардың қандай ақпарат тұтынып жүргенін бақылауы қажет. Сондай-ақ мектептер мен жоғары оқу орындарында құқықтық және діни сауаттылықты арттыруға бағытталған жұмыстардың маңызы зор. Дәстүрлі рухани құндылықтарды насихаттау да жастардың теріс ағымдардың ықпалына түспеуіне ықпал етеді.

Қазіргі қоғамда әр адам ақпаратты сүзгіден өткізіп қабылдай білуі керек. Күмәнді діни материалдарға сын көзбен қарап, сенімді дереккөздерге жүгіну маңызды. Діни мәселелер бойынша ресми мамандардың пікіріне сүйену көптеген қателіктің алдын алады.

Қорытындылай айтқанда, діни экстремизм – қоғамның қауіпсіздігі мен бірлігіне төнетін елеулі қатер. Оған қарсы тұру –  мемлекеттік органдармен қатар, бүкіл қоғамның ортақ міндеті. Білімді, саналы және жауапты ұрпақ қалыптастыру арқылы ғана біз бейбітшілік пен тұрақтылықты сақтап, елдің жарқын болашағын қамтамасыз ете аламыз.

Гүлнара СЫДЫҚҚЫЗЫ,

Абай ауылдық клубының әдіскері