Арал бір ғасыр бұрын
(1926 ЖЫЛ)*1926 жылы Қазақстанда 10 өндірістік трест болған. Оның екеуі Аралда: бірі - Арал мемлекеттік балық тресі, екіншісі - Сексеуіл тресі. Орталығы Ташкентте болған Сексеуіл тресіне - "Аралтұз", "Сапақтұз", "Шөміштұз" деген өндіріс орындары қараған.
*1925-1926 жылдары Аралда 3120 тонна тұз өндірілген.
*Сексеуіл кентіндегі №87 мектеп орыс сыныптары бар бастауыш мектебі болып ашылып, алғашқы оқушыларын қабылдады.
*Қамбаш ауылының тумасы Шақпақ Артықбаев Жетісу губерниясының комсомол комитетінің хатшысы болып сайланды.
*Бозбала ақын Жәмет 1926 жылы Мырзастағы нағашысы Нұртуған шайырға барып, ақ батасын алып, жыраулық жолға біржолата беталыс жасайды.
*11 наурызда Арал теңізі елді мекені Арал қыстағы болып аталды.
*Арал мемлекеттік балық тресі көктемгі балық аулау науқанына дайындауға 32500 сом, Қамыстыбас станциясында қатырлыған жас балық дайындауға 80 мың сом қаралған.
*Арал қыстағының Кеңес төрағасы қызметін Төлеген Медетбаев атқарды.
*1926 жылы Арал портынан шыққан жүк кемелері Шаржау, Мойнақ аралығында тұрақты қатынап тұрған.
*1926 жылы Т.Елемесов, А.Қырбаев, Д.Құламсейітов, Шөкеновтер Шымкент қаласындағы мұғалімдер даярлайтын оқу орнын бітіріп келіп, ағарту саласында еңбек жолын бастады.
*Арал теңізі теміржол стансасы мектебінде (қазіргі №64 орта мектеп) меңгерушісі болып Әбдірахман Махатов қызмет атқарып жүрді.
*Сол жылдары Арал қыстағының халқы әр жерде - Сойырқас төбе, Шіркеу төбе, Диірмен төбе, Атшабар төбе, Америка, тағы басқа да төбелерде ауыл-ауылға бөлініп отырды.
*1926 жылы Аралдың белгілі тұлғалары Күлпәш Бисенова, Әріп Өксікбаев, Әбубәкір Әнесов, Төлеген Әлімбетов, Сақ Мәуленқұлов, Алтыбай Құмаров, Төлебай Орынбаев, Тілеген Қалиев, Бақыт Басықараевтар дүниеге келді.
