Күн тәртібінде – құқық бұзушылық профилактикасы

Қоғамда заң мен тәртіп идеологиясын ілгерілету жөніндегі тұжырымдама аясында Арал аудандық соты әкімшісінің басшысы З.Сермағамбетова №64 орта мектептің жоғары сынып оқушыларымен кездесті.

Сот әкімшісінің басшысы З.Сермағамбетова өткізіліп отырған шараның басты мақсаты жасөспірімдер арасындағы құқық бұзушылықтардың профилактикасы, сондай-ақ олардың құқықтық сауаттылығын арттыру болып табылатынын атап өтіп, қылмыстық және әкімшілік құқық бұзушылық туралы заңнама нормаларын түсіндірді. Кәмелетке толмағандар арасында жиі кездесетін құқық бұзушылықтарға мысалдар келтірді.

Сондай-ақ, жасөспірімдердің құқық бұзушылық жасауының салдары олардың келешек тағдырына кері әсер етуі мүмкін екенін түсіндіріп, кәмелетке толмағандардың мінез-құлқының мәдени талаптарға сай болуына, заңға бағыну қағидатын ұстану қажеттігіне назар аударды.

Шара соңында З.Сермағамбетова оқушылардың қойған сауалдарына мазмұнды жауап беріп, туындаған мәселелерді ата-аналарымен және ұстаздарымен бірлесіп шешуге тырысу құқық бұзушылықтардың алдын алуға мүмкіндік беретінін атап өтті.

Арал аудандық соты