Сирек кездесетін дертке шалдыққан балақайдың отасына ақша керек

Өздігінен үлкен дәреті жүрмейтін, салдарынан іші күп болып ісіп кететін төрт жасар Айсұлтан Әлібек дүниеге келе сала Гиршпрунг ауруына шалдыққан. Кішкентай болса да үлкен адам секілді сөйлеп, ойланатын балапан төрт жыл бойы отандық дәрігерлерде емделді. Алайда бүлдіршін шетелдік мамандар мен қазақстандықтардың көмегіне зәру. Айсұлтанның анасы Әйгерім кішкентай ұлына осы уақытқа дейін неше рет ота жасалғанын, оған қандай елдің дәрігерлері ота жасап беруге дайын екенін айтып берді.

 Айсұлтан Әлібектің тік және тоқ ішектері туылғанынан бастап дұрыс жұмыс істемейді. Алғашқы кезде отандық дәрігерлер бүлдіршіннің диагнозын нақтылай алмаған. Ата-анасына балада асқазан-ішек жолдарының туа біткен ақауы бар екенін айтып, ота жасатудың қажеті жоқтығына сендірген. Баланы басқа дерттен емдеген мамандар клизманы қайта-қайта жасай берген.
Шымкенттегі дәрігерлердің емі көмектеспеген соң, Айсұлтанның әке-шешесі жиған-тергенін алып, елордаға келеді. Астаналық дәрігерлер сегіз айлық баланың Гиршпрунг дертіне шалдыққанын хабарлайды. Гиршпрунг деп нәрестелерде туа пайда болатын ішек өтімсіздігін атайды. 4 жасар бала бұл аурудың ректоаналды пішінінен, энтерколитпен, дисталды копролитпен декомпенсация сатысындағы  ассоциаланған күрделі түрінен қиналып жүр. Әдетте нәрестелер дүниеге келген күннің ішінде алғаш рет үлкен дәретке барып, тоңғағын шығарады. Айсұлтанда ол туылғанынан екі күн өткенде шыққан. Тоңғақ — сәбидің алғашқы нәжісі. Жатырда жатқанда қалыптасқан ішектік эпителий жасушаларынан, шырыштан, қағанақ сұйықтығынан тұрады. 
Мұндай дертке шалдыққан бала клизма жасатпай үлкен дәретке бара алмайды. Өз күшімен ішіндегісін сыртқа шығара алмағандықтан іші күп болып ісіп кетеді. Салдарынан ағзаның өзге мүшелері зардап шегеді.
"Нұр-Сұлтанда екі рет ота жасалды. Бірінші ота кезінде хирургтарға ішекті сыртқа шығаруға тура келді. Балам сыртқа шыққан ішегімен алты ай жүрді. Сосын дәрігерлер қайтадан ота жасап, тік ішекті орнына салды. Бірақ екінші отаның уақыты келгенше Айсұлтанның кеңейіп кеткен ішектерінде ойық жаралар пайда болды. Дәреті сыртқа шықпай қалған соң, ішкі ағзалары уланды. Отадан кейін алты ай сайын ем қабылдап тұрдық, өзін жақсы сезіне бастағаны сол еді, іші қайтадан жүрмей, күп болып ісіп ауыра бастады. Тіпті жел де шықпай қалды. Үлкен адамның өзі іші ауырып, дәреті жүрмей қалса, бір күннің ішінде қиналып кетеді ғой. Ал Айсұлтанның іші он-жиырма күн көлемінде қатты ауырады", - дейді Айсұлтанның анасы.
"Бармаған жеріміз, баспаған тауымыз қалмады. Баламның дәреті уақытылы шықпайтындықтан ағзасына да зақым келіп жатыр. Бауыры ісініп, жүрегі үлкейіп кетті. Қазіргі уақытта жұмыс істеп тұрған жарты тоқ ішегін осы қалпында сақтап қалу керек", — дейді ашынған ана.

Жарты ішегінен айырылып қалған жағдайда балаға өмір бойы мүгедек болып қалу қауіпі төніп тұр екен. Кішкентай болса да барлығын жақсы түсінетін Айсұлтан ата-анасын артық мазалай бермейтін көрінеді. Үш ұлдың ортаншысы керісінше қайда барса да бауырларын ойлап жүреді. 
"Бала сияқты күледі, ойнайды. Дамуында ешқандай кемшілік жоқ. Бірақ көзінен мұң барын байқаймын. Кішкентай күнінен бастап ауруханадан шықпайды ғой. Қыдырып қайтайық, паркке барайық десек, үйде өзі жыламай отыра беретінін, ешқайда барғысы келмейтінін айтады. Ал сыртта бір нәрсе алып берсеңіз, міндетті түрде жартысын бауырына қалдырады. Сондай өзі бауырмал", — дейді Әйгерім.  
Ендігі кезекте кішкентай отандасымыз барлық қазақстандықтардың көмегіне зәру, оған Корея немесе Израильде ота жасату үшін 53 мың АҚШ доллары қажет.
Баланың жазылып кетуіне өз үлесіңізді қосқыңыз келсе, мына нөмірлер арқылы ақша аудара аласыз:
Каспий GOLD: 5169 4931 1007 9343 
ЖСН 8806 2940 1511.

https://stan.kz