Токио Олимпиадасына 96 спортшы қатысады

Жуырда Қазақстан олимпиадалық командасының негізгі бөлігі Жапонияға аттанды. Олардың қатарында спортшылар, бапкерлер, дәрігерлер, ғылыми-кешенді топ мүшелері, Олимпиададағы Қазақстан Миссиясының өкілдері бар.

Токиоға "Ақбұлақ" олимпиадалық базасынан каратэшілер, садақ атушылар, үстел теннисі мен семсерлесу командасы, ауыр атлеттер мен боксшылар аттанды. Өзге де жаттығу базаларынан жүзу спортының, су добы спортының өкілдері, жеңіл атлеттер, велошабандоздар, стенд ату мен нысана көздеуден құрама командалар, сондай-ақ, дзюдошылар Токиоға жол тартты.

Атлеттер екі апталық карантинде болып, соңғы жаттығу жиындарын Алматы қаласы мен Алматы облысында өткізді. Ойын қарсаңындағы соңғы күндерді спортшылар оқшаулану режимінде өткізіп, сыртқы әлеммен байланысқа түскен жоқ.

"Біз Олимпиада ойындарына қатысушы спортшылардың қауіпсіздігіне бағытталған ХОК пен Токио-2020 ұйымдастыру комитетінің барлық талаптарын орындадық. Ұлттық олимпиадалық комитет пен ұлттық федерациялар спортшылардың сапалы әрі қауіпсіз дайындалуына бар жағдайды жасады. Біздің командадағы 96 спортшы ортақ еңбегімізді жемісі. Спортшылар мен бапкерлерге, сондай-ақ, спорттық дәрігерлерге бірлескен жұмысы үшін рақмет айтамыз", – делінген Ұлттық олимпиадалық комитетінің жазбасында.

         Делегацияның алғашқы бөлігі чартерлік рейспен Алматыдан Токиоға ұшып кетті. Осы орайда, барлық қауіпсіздік шаралары сақталған. Делегацияның аэропорт және әуекомпания қызметкерлерімен байланысқа мейлінше аз түсуі қадағалануда. Авиациялық қызметкерлердің барлығы да екі мәрте ПТР сынақтан өтті.

Токиода өтетін XXXII жазғы Олимпиада ойындарына қызылордалық спортшылар да қатысады. Сыр елінің атынан Қызылорда облысынан 3 спортшы: бокстан ҚР еңбек сіңірген спорт шебері, Әлем чемпионатының күміс жүлдегері Қамшыбек Қоңқабаев, еркін күрестен ҚР еңбек сіңірген спорт шебері, Әлем чемпионатының күміс жүлдегері Дәулет Ниязбеков және каратэ-додан ҚР халықаралық дәрежедегі спорт шебері, 3 дүркін Әлем, 3 дүркін Азия чемпионы Мөлдір Жаңбырбай жолдама алды.

28 шілдеге жоспарланған екінші рейспен Жапонияға 43 адам жол тартады. Олардың қатарында балуандар, көркем гимнастикадан Қазақстан командасы, әртістік жүзу, бессайыс және жеңіл атлеттердің бір бөлігі бар.

Сонымен бірге Олимпиадада ел намысын қорғайтын қазақстандық спортшылардың киім үлгісі әлемдегі ең үздік формалардың бірі болып танылды. Бұл туралы forbes.com порталы хабарлап отыр. Тізімге Қазақстанмен қатар АҚШ, Ресей, Либерия, Чехия, Қытай, Оңтүстік Африка және Жапония мемлекеттері кірді. Айта кетейік, ұлттық құраманың киімін дизайнер Салтанат Баймұхамедова әзірледі. Бірақ отандық спортшылар да оның матасын таңдап, эскизін дайындауға атсалысты.

Жаттығу кезінде арнайы спорттық базаларды қажет еткен спортшылардың шамамен үштен бір бөлігі карантин мен дайындықтың ақырғы кезеңін шетелде өткізді. Олар тікелей Токионы бетке алады.

8 шілдеден бастап Жапонияда Олимпиада ойындарындағы Қазақстан Миссиясы жұмысын бастады. Қазақстан елшілігі мен СІМ қолдауы арқылы спортшылармен кездесуге қажетті заттар мен жаттығуға керекті қосымша құрылғылардың барлығы да дайындалды.

Олимпиада ауылындағы тіршілік те карантин талаптарына сай болмақ. Түрлі ел командаларының, әртүрлі спорт түрлеріндегі атлеттердің өзара байланысуына тыйым салынған. Олимпиадалық ауыл мен жаттығу және спорт залдарының арасындағы маршруттан ауытқуға болмайды, қоғамдық көлікті пайдалануға рұқсат жоқ. Коронавирусқа байланысты күн сайын тест тапсыру міндетті саналады. Сонымен қатар, спортшылардың жүрген орны мен денсаулық жағдайын бақылайтын бірнеше қосымшаларды ұялы телефонға орнату міндеттеледі.

Қазақстан олимпиадалық командасының сапында 97 лицензия жеңіп алған 96 спортшы бар. Олимпиада ойындары ашылу салтанаты бүгін Нұр-Сұлтан уақытымен 17:00-де Токио стадионында басталады.