Толқын Tolqyn.kz ақпараттық агенттігі
» » Жеңіске ұмтылдырған тартысты турнир

Жеңіске ұмтылдырған тартысты турнир

Болашақ елдің атын шығарып, абыройын асқақтатар ұландардың бүгінгі беталысы жаман емес. Олар бүгінде өздерін жан-жақты шыңдап, салауатты өмір салтын ұстануда аса белсенді. Мектеп жасынан басталатын осындай мүмкіндіктер қазірдің өзінде жас жеткіншектердің жеңіске деген жігерін жанып, қабілетін арттырып келеді. Өткен аптада сондай бір тартысты турнир өтті ауданда. 1 маусым – Халықаралық Балалар күніне орай Арал ауданы әкімінің кубогы үшін үстел теннисінен өткізілген турнирге жалпы саны 70-ке жуық жасөспірімдер қатысты. Мектеп оқушылары арасында өткен додада 15 команда өзара бақ сынасып, үздік ракетканы анықтады.
Жылдамдыққа бағытталған бәсекеге қатысушылар қызу дайындықпен келген. Шапшаңдық пен ептілік ұштасқанда ұтысқа жетелейтін тартысты турнир әрбір спортшының жеңіске деген ұмтылысын айқын аңғартқандай. Алдымен турнирдің ашылу рәсіміне аудан әкімінің орынбасары К.Бержанов қатысып:
– Ата-ананың ең үлкен бақыты – баласының жақсы азамат болып өсуі болса, ілгері ойлайтын мемлекет пен қоғамның да басты мақсаты – елге ие болатын білімді де Отаншыл ұрпақ тәрбиелеу. Себебі, бүгінгі ұрпақ – ертеңгі ел үміті, ұлттың жалғасы. Бұл шара өздеріңіздей жастарымыздың келешекте салауатты өмір салтын нық ұстанып, өскелең ұрпақтың спортқа деген қызығушылығын арттыру бағытында ұйымдастырылуда. Үстел теннисінен өткізілетін доданы ашық деп жариялаймын, – деп жас спортшыларға сәттілік тіледі.
Тартысты өткен турнир қорытындысы бойынша жеңімпаз командалар аудан әкімінің Алғыс хатымен, түрлі номинациялар және бағалы сыйлықтармен марапатталды.
«Толқын» ақпарат

04 маусым 2024 ж. 869 0