"Ауыр болса да айтайын". Шетелдік маман Головкин - Деревянченко жекпе-жегінде кім жеңетінін айтты
Украинаның кәсіпқой бокс ұлттық лигасының президенті Михаил Завьялов Luckypunch.net порталына берген сұхбатында қазақстандық Геннадий Головкин (39-1-1, 35 КО) мен украиналық Сергей Деревянченко (13-1, 10 КО) жегіне қатысты пікір білдірді.Боксшылар 5 қазанда Нью-Йорктегі Madison Square Garden аренасында орта салмақтағы IBF титулы үшін жұдырықтасады.
"Сергей жақында ғана әлем чемпионы титулы үшін жұдырықтасты. Ол бәріне жалғыз қарсы тұрды. Бапкері Джейкобстың бұрышында болды ғой, ол жақсы жұдырықтасты. Енді аз уақыт өте қайта мүмкіндік алғаны тамаша.
Головкинмен жұдырықтасады, оны көптен бері, Олимпиада ойындарынан білемін. Деревянченко мұның әлем чемпионы үшін соңғы бұлқынысы екенін біледі деп ойлаймын. Оған жанкүйер боламыз.
Аздаған басымдықты Головкинге беретін едім. Турасын айтқанда Головкиннің техникасы мықты, тәжірибесі мол, кәсіпқойда көрмегені қалмады. Әрине жасы келіп қалды, дегенмен, мысалы "Канеломен" жекпе-жекте ол жеңілген емес.
Сергей үшін өте ауыр жекпе-жек болады. Бұл қайта келмес мүмкіндік екенін түсінгендіктен барынша тістеніп қалар. Головкинге де шегінерге жол жоқ, ол өз стилінде жұдырықтасады, оның джебі жақсы, қозғалысы да әдемі, соққысы нокаутқа түсіреді. Қанша ауыр болғанымен айтайын, бұл жекпе-жекте басымдық Головкинде.
Алайда Сергейге жанкүйерміз, ол жеңсе, мүмкін емес дүниені жасайды", - дейді Завьялов.
