Аралда бос жұмыс орындары жәрмеңкесі өткізілді
Кеше З. Шүкіров атындағы калалық мәдениет үйінде аудандық прокуратураның бастамасымен және аудан әкімдігінің халықты жұмыспен қамту орталығының ұйымдастыруымен аудандық пробация қызметі бөлімінің есебінде тұратын, соттылығы бар азаматтарға арналған «Жұмыс іздеймін» атты бос жұмыс орындары жәрмеңкесі болып өтті. Жәрмеңкеге аудан прокуроры А.Тәженов, прокурор көмекшісі А.Жанесенова және пробация бөлімінің қызметкерлері, аудандық жұмыспен қамту орталығының мамандары қатысты. Жәрмеңкеге пробация қызметі бөлімінде есепте тұратын азаматтар шақырылып, 8 мекемеден 58 бос орындары ұсынылды.
Бос жұмыс орындары және бос лауазымдар жәрмеңкесін өткізу нәтижесі бойынша 1 азамат «Арал» сервистік дайындау орталығына, 2 азамат «Нұр» қонақ үйіне, 1 азамат жеке кәсіпкер А. Маханованың шаштаразына тұрақты жұмысқа орналасуға жолдама алды.
Сондай-ақ, пробация қызметі есебінде тұратын «Бастау бизнес» жобасы аясында қысқа мерзімді оқу курсынан өткен Әбішев Асылхан мен Сахиев Нұрдаулетке 505 мың теңге гранттың сертификаты табысталды.
