Толқын Tolqyn.kz ақпараттық агенттігі
» » Аудан әкімі Сыр беткейдегі елдің тыныс-тіршілігімен танысып қайтты

Аудан әкімі Сыр беткейдегі елдің тыныс-тіршілігімен танысып қайтты

Күні кеше аудан әкімі Мұхтар Оразбаев Сыр беттегі ауданға қарасты бірқатар елді мекендерді аралап, жергілікті жердегі атқарылып жатқан жұмыстардың жай-күйімен танысып қайтты.Алдымен Бөген ауылдық округіне қарасты Қарашалаң елді мекеніне табан тіреген аудан әкімі Қарашалаң су тарату станциясында жүргізіліп жатқан күрделі жөндеу жұмыстарына куә болды. Атап өту қажет, жергілікті тұрғындардың ауыз су мәселесіне қатысты ұсынысына сәйкес бастау алған құрылыс аясында 14 шақырымды құрайтын «Бөген-Қарашалаң» магистральді су құбыры жаңартылып, елді мекендегі екі бірдей су қоймасына жөндеу, ауылішілік су құбырларын жаңғырту жұмыстары жүргізілген. Сондай-ақ, әр үйге су желісі тартылып, бүгінде су есептегіш құралы орнатылып үлгерген. Қазіргі таңда елді мекендегі су көтеру мұнарасы жаңартылу үстінде. Аталған жұмыстардың жайына қаныққан аудан басшысы одан әрі елді мекендегі №75 мектепке барып, дәстүрлі оқу форматында білім алып жатқан оқушылармен жүздесіп, білім ошағының жылу беру жағдайын бақылап өтті.
Одан әрі ұзындығы 20,52 шақырымды құрайтын «Бөген-Ақлақ» бағытындағы жол жөндеу жұмыстарымен танысты. Бүгінде аталған жолдың қиыршық тас төсеу жұмыстары аяқталған болса, алдағы уақытта жолдың 10 шақырымын асфальттау жұмыстары жоспарлануда.
Аудан басшысы мұнан әрі өткен жылы бастау алған аудандық маңызы бар «Ақлақ-Қаратерең» бағытындағы 4,9 шақырым жолдың және жалпы ұзындығы 23,88 шақырымды құрайтын «Қаратерең-Жаңақұрылыс» бағытындағы жолдардың жөндеу жұмыстарымен танысты. Сонымен қатар, төселіп жатқан жолдардың сапасын бақылау мақсатында жол құрылысына жауапты мердігер «Строй модуль-Астана» ЖШС өкілдерімен кездесіп, қаржының тиімді игерілуі мен жол жөндеу жұмыстарының сапалы әрі мерзіміне сәйкес орындалуын тапсырды.
Сапар барысында ауданға қарасты Аманөткел ауылдық округі, Хан елді мекені тұсындағы көне қалқымалы көпірдің жай-күйі де назардан тыс қалмады. Қалқымалы көпірдің қазіргі жағдайымен танысқан аудан әкімі тиісті бөлімге ағымдағы жыл соңына дейін көпірді жөндеу жұмыстары үшін бюджеттік өтінім ұсынуды тапсырды.
Одан әрі аудан әкімі М.Оразбаев ауданға қарасты Райым ауылдық округі, Қызылжар елді мекеніне арнайы ат басын бұрып, жергілікті тұрғындармен кездесті. Кездесу барысында Қызылжар елді мекеніне кіреберіс жолдың төңірегінде туындаған мәселе бойынша пікірлесіп, мәселенің заң аясында шешілуі бағытындағы атқарылып жатқан жұмыстарды кеңінен түсіндіріп өтті.
Сонымен қатар елді мекендегі бірқатар әлеуметтік нысандарға бас сұғып, жұмыс барысы мен жылу беру жүйесінің жағдайын пысықтап қайтты.
Жұмыс сапары соңында Жетес би ауылдық округіне қарасты Ескіұра елді мекенінің кіреберіс жолының жөндеу жұмыстарына куә болып, жол сапасының стандарттарға сай төселуін қатаң ескертті. Аталып өткен кіреберіс жолдың жөндеу жұмыстарын жүргізіп жатқан мердігер «СтандартОйл КЗО» ЖШС жұмыстар ай соңына қарай толықтай аяқталатындығын жеткізді.
Арал ауданы әкімдігінің баспасөз қызметі

18 қазан 2020 ж. 497 0