Мереке күні 50 оқушыға велосипед табысталды

Халықаралық балаларды қорғау күні мерекесі қарсаңында аудан әкімі Серік Сермағамбетов орталық алаңда мектеп оқушыларымен кездесіп, аймақ басшысының атынан сыйға берілген 50 велосипедті табыстады.

Аталған сыйлықтар бірінші кезекте әлеуметтік көмекті қажет ететін, аз қамтылған, көпбалалы және ата-ананың қамқорлығынсыз қалған отбасы балаларына берілді.

Сыйлықтарды табыстаған аудан басшысы: -«Еліміздің ертеңі, ұлттың болашағы – Өздеріңіз! Сондықтан да, жастық жігермен сапалы білім алып, еліміздің өсіп-өркендеуіне үлес қосар азаматы атаныңыздар. Дендерің сау, оқуда озат болыңыздар. Жазғы демалыстарыңды көңілді өткізулеріңізге тілектеспін. Көліктеріңіз құтты болсын!», - деп ақжарма тілегін жеткізді.

Мереке күні ерекше сыйлыққа ие болып, шат-шадыман қуанышқа бөленген бүлдіршіндер шексіз алғыстарын білдірді.