СУ РЕСУРСТАРЫ ЖӘНЕ ИРРИГАЦИЯ МИНИСТРІ ЖҰМЫС САПАРЫМЕН АРАЛ АУДАНЫНДА БОЛДЫ

Бүгін Арал ауданына Су ресурстары және ирригация министрі Нұржан Нұржігітов келді. Жұмысшы топ құрамында облыстық табиғи ресурстар және табиғат пайдалануды реттеу басқармасының басшысы Марат Құрманбаев, «Қазсушар» РМК Қызылорда филиалының басшысы Ролан Ахметов, Арал-Сырдария бассейндік инспекциясы басшысының м.а. Зейнолла Қазтуғанов және «Халықаралық Аралды құтқару қорының Қазақстан Республикасындағы атқарушы дирекциясының» директоры Болат Бекниязов болды.

Аудан әкімі Серік Сермағамбетов Су ресурстары және ирригация министрі Нұржан Нұржігітовке аудандағы ауыз сумен қамту, суды тиімді пайдалану, көлдер жүйесін сақтау мен каналдарды тазарту, т.б су шаруашылығы саласындағы атқарылып жатқан шаралар барысын баяндады.

Нұржан Нұржігітов алдымен «Ақлақ» су тоспасының жай-күйін бағамдады. Сырдария өзенінің Арал теңізіне құяр сағасындағы «Ақлақ» су тоспасы өткен жылы жөндеуден өткен. Қазіргі таңда су қоймасынан теңізге қарай секундына 9 текше метр су түсуде.

Мұнан соң, министр «Көкарал» бөгетінің жағдайын көрді. Онда Нұржан Молдиярұлы «Көкарал бөгетін сақтап қалу және Сырдария өзенінің атырауын қалпына келтіру» жобасы бойынша атқарылып жатқан жұмыстармен танысты.

Арал теңізінің солтүстік бөлігінің тұздылығын азайту мақсатында Тұщы, Сарытерең, Қарашалаң-1, Қарашалаң-2 каналдарына механикалық тазарту жұмыстары жүргізілді. Аталған жұмыстар нәтижесінде 1500 гектардан аса шабындық аумақты суландыруға және Кіші Арал теңізін суға толтырып, теңіз суын тұщытуға мүмкіндік туындауда.