Темір жолдан төнер қауіп көп

Темір жол қауіпті аймақ. Тұрғындары тығыз орналасқан Арал қаласында поезд пен жаяу жүргіншілер қозғалысы тынымсыз жүріп жатқандықтан сақтық шаралары барынша назарда болуға тиісті. Әсіресе, шойын жолға жақын орналасқан мектеп оқушылары мен тұрғындар қауіпсіздігі бір сәтке болса да қараусыз қалмайды. Адам өміріне қауіп төнбеу мақсатында Арал теңізі бекетінің желілік полиция бөлімшесінің қызметкерлері тұрақты түрде жұмыс атқарып келеді. Мектеп оқушыларына, қала тұрғындарына темір жолдан өткен жағдайда аса мұқияттық танытуды әр кез еске салып отырады. Жол жүру барысындағы салғырттық пен ойын жасындағы балалардың поезд жолын кесіп өту кезіндегі немқұрайлығы өздеріне қаншалықты қауіп төндіретінін түсіндіруден жалыққан емес.

Бұл бағыттағы қозғалыс барысында мұнан да бөлек қатерлер жетерлік. Рельстердің бойына бөгде заттар қою, көлік қозғалысын реттеуге арналған бағдаршамдарды, байланыс құралдарын зақымдау да үлкен апаттық оқиғаға әкеліп соқтырары белгілі. Сондай-ақ, жолаушылар поездына тас лақтыру да тек қана мүлікті зақымдаумен шектелмеуі әбден мүмкін. Шашыраған әйнек сынықтары жолаушылардың өміріне айтарлықтай қауіп төндіреді. Міне, осындай жағдайлардың орын алуына байланысты аудан көлемінде әкімшілік шаралар да көрініп жүр.

«Тәртіпсіз ел болмайды, тәртіптке бағынған құл болмайды» дейді қазақ. Өз өміріміздің қауіпсіздігі үшін тәртіп сақтауды естен шығармайық.

Б. Ерсейтов,

Арал теңізі станциясындағы желілік полиция

бөлімшесінің бастығы, полиция майоры.