ТОРҚАЛЫ ТОҚСАН ЖЫЛДЫҢ ТОЛҒАУЫ БАР
Заманында теңізі тасыған елдің тұрмысы да қалыпты еді. Сонау өткен ғасырдың басында осы теңіздің үстінен Орынбор-Ташкент темір жолы салынғаны да халықтың есінде. Алтықұдық елді мекенінің үстінен өткен осы темір жолдың бойынан «Арал теңізі» стансасы салынған еді. Осылайша, елдегі алыс-беріс пен барыс-келістің ауқымы ұлғайып, тіршілігін теңіз нәрімен байланыстырған отырықшы елдің әл-ауқаты еселене бастады. Бұл 1905 және 1920 жылдардың аралығындағы өрлеу мен түлеудің жаңа кезеңі еді. Ал, 1925 жылдары орталықтың қаулысына сәйкес балық шаруашылығына қатысты барлық ұжымдар біріктіріліп, «Арал мемлекеттік балық тресі» болып құрылды. Сол кездері осы саланың жергілікті жерде өркендеуі мен дамуына ерекше ықпал беретін кәсіби мамандар даярлау мәселесі күн тәртібінен түспейтін деңгейге жетті. Себебі, өндірістің көзі күн сайын ұлғайып, оған мамандар ауадай қажет бола бастады. Осылайша, 1927 жылы Аралдағы тұңғыш кәсіби мектеп «Балық аулау оқу артелі» деген атпен құрылды. Міне, маман даярлау ісі бойынша негізі қаланған осынау білім ордасы бүгінде Арал индустриалды-техникалық колледжі деп аталады. Артелдік кезеңнен заманауи колледж деңгейіне көтерілген осынау іргелі қара шаңырақтан күні бүгінге дейін 16 мыңға жуық маман білім алып, еліміздің әр түкпірінде түрлі салаларда еңбек етуде. Тарихы терең Арал индустриалды-техникалық колледжінің 90 жылдық мерейтойы кеше аудан көлемінде аталып өтті. Іргелі білім ордасының салтанатты шараларына аудан әкімі М.Оразбаев қатысты. Алдымен аудан әкімі бастаған бір топ зиялы қауым өкілдері заман көшіне ілескен бүгінгі оқу ордасының тыныс-тіршілігі мен өткеніне қанықты. Атап айтқанда, өндірістік шеберханада тігінші мамандығын даярлау барысымен танысса, онан соң заман талабына сай сұранысқа ие байланыс саласы бойынша білім алып жатқан шәкірттермен жүздесті. Артынша, аталған білім ұясының бүгіні мен кешегісі қамтылған мұражайда болды. Онда «Кәсіптік көкжиегін кеңейткен білім ұясы» атты кітаптың тұсаукесер рәсіміне қатысып, лентасын қиды.
Колледж ұжымымен болған емен-жарқын жүздесуден соң, аудандық мәдениет үйінде «Болашаққа бағдар: нәтижеге бағытталған кәсіби білім» атты облыстық ғылыми-тәжірибелік конференция шымылдық түрді. Онда алдымен аудан әкімі М.Оразбаев сөз алып, білікті маман даярлауда бар күш-жігерін жұмсап, білім саласының өсіп-өркендеуіне өзіндік үлестерін қосып жүрген колледж ұстаздарын мерейтойларымен құттықтап, жауапкершілігі мол ұстаздық жолдарына зор жетістіктер тіледі. Мұнан соң, облыстық білім басқармасы басшысының міндетін атқарушы А.Қасымова және Арал индустриалды-техникалық колледжінің директоры Н. Әбішевтер аталған білім ордасының бүгіні мен болашағын қамтитын баяндама жасады.
Іргелі білім ұясының 90 жылдық мерейтойымен құттықтай келгендердің қарасы қалың. Солардың қатарында «Аралтұз» АҚ-ның вице-президенті Н.Әуесханов, колледж ардагерлері кеңесінің төрағасы С. Ибрашев және Қызылорда индустриалды-техникалық колледжінің директоры Т.Оразбековтер болды.
Конференция соңында аталған колледжде еселі еңбек етіп, маман даярлауда тер төгіп келе жатқан бір топ ұстаздар қауымы ҚР Білім және ғылым министрлігінің Құрмет грамотасыменжәне облыс, аудан әкімінің Алғыс хаттарымен марапатталды. Бұл марапаттарды аудан әбасшысы М.Оразбаев табыстады. Ал, облыстық білім басқармасының Құрмет грамотасын ұстаздар қауымына облыстық білім басқармасы басшысының міндетін атқарушы А.Қасымова табыстады.
Осылайша, білім беру саласында табысты жылдарды бастан өткеріп, 90 жылды еңсерген іргелі қара шаңырақтың айтулы мерейтойына келген барша қонақтар өздерінің жүрекжарды тілектерін жеткізді.
А. Бисенов.
