ЖАҢА ЗАҢНАМАНЫ ІСКЕ АСЫРУ БАРЫСЫ ТАЛҚЫЛАНДЫ

Бүгін аудан әкімдігінің мәжіліс залында аудан әкімінің төрағалығымен Мемлекеттік сатып алу туралы жаңа заңнаманы іске асыру жөнінде мәжіліс өтіп, бірқатар мәселелер талқыланды.Өздеріңізге белгілі, 2024 жылғы 1 шілдеде Қазақстан Республикасының Президенті «Мемлекеттік сатып алу туралы» Жаңа Заңға қол қойды. Жаңа Заң 2025 жылдың 1 қаңтарынан бастап күшіне енеді. Заңның мақсаттары - сатып алынатын тауарлардың, жұмыстардың, көрсетілетін қызметтердің сапасын арттыру, мемлекеттік сатып алудың бірыңғай платформасын құру және «Қоғамдық мониторинг» институтын қалыптастыру.
Аудан әкімі қабылданған жаңа зоң нормаларына сәйкес сатып алу конкурстарын өткізу үшін тез арада тиісті шешім қабылдау керектігін айтып, салаға жауапты орынбасарлары мен тиісті мамандарға тапсырма берді.
– Келесі жылға жоспарланған мемлекеттік сатып алу конкурстарын өткізу үшін шұғыл арада тиісті шешімдер қабылдауымыз қажет. Конкурстар жариялау үшін өтінімдерді облыстық мемлекеттік сатып алу басқармасына ұсынылуын жеделдету керек. Көктем және жаз мезгілінде орындалатын жұмыстар мен көрсетілетін қызметтер мерзімінде басталмаған жағдайда, бюджет қаражаты тиімді игерілмеуі ықтимал. Сондықтан, бюджеттік бағдарлама әкімшілеріне, бұл жұмыстарды осы бастан қолға алуды тапсырамын, – деді аудан әкімі А.Оңғарбаев.
Сонымен қатар жаңа заң өзгерістерін мұқият зерделеп, мәселге бұрынғы көзқараспен қарауға болмайтынын ескертті. Қазынадан бөлінген әрбір тиын мемлекеттік қатаң бақылауында болатынын айтып, мемлекеттік сатып алу жұмыстарында мейілінше ашықтық пен әділдік болуы керектігін жеткізді.
Мемлекеттік сатып алу туралы жаңадан қабылданған заңның талаптары мен шектеулерін түсіндіру мақсатында жауапты тұлғалардың қатысуымен семинар-тренингтер ұйымдастырудың маңызыдылығын атап, алдағы уақытта электронды цифрлық қолтаңба арқылы жүргізілетін қаржылық операциялар мұқият бақылауда болуы керектігін ескертті.
Жиын соңында аудан әкімі А.Оңғарбаев осы бағыттағы жұмыстарды кестеге сәйкес жүргізіп, құжаттамалық қызметтерде әрбір әрекет заң шеңберінде атқарылуы керектігін нақтылады.
Аудан әкімінің баспасөз қызметі