Өнерімен өрге озған өрендер
Музыка – адамның эмоциялық күйін нақты және нанымды жеткізе алады. Ал музыка өнері ұлы өнер екенін қашанда дәлелдеп келеді. Бұл жас талғамас, ұлтқа бөлмейтін шектеусіз өнер түрі. Осы жолды таңдаған әрбір музыкалық дарын иесі өз бағын сынауда түрлі сайыстар мен жарыстарды бағындырары анық. Дәл осындай классикалық және заманауи өнердің үздік үлгілерін меңгеру және орындау арқылы білім алушы тұлғасының рухани мәдениетін қалыптастыру, оқыту және шығармашылық дамытудағы ролін арттыру мақсатында «Дарын» облыстық қосымша білім беру орталығының ұйымдастыруымен өткізілген «Жас музыкант 2025» байқауы жас өнерпаздар үшін берілген үлкен мүмкіндік. Бұл сайыста аудандық балалар өнер мектептебінің білім алушылары да өз бақтарын сынап қайтты. Әрине жарыс қорытындысы бойынша оқушылар көңілге қонымды жүлделермен оралды. Атап айтсақ, жас музыканттар арасында облыстық кезеңнен аудандық Өнер мектебінің орта топ бойынша, Дәрменов Талғаттың жетекшілігімен баян класының оқушысы Нұрасыл Уали бас жүлде иегері атанды. Бұдан бөлек орта топ, Санжар Мырзағұлов жетекшілігі бойынша баян аспабынан Дамир Ғалымбек бірінші орын иеленді. Қос өнерпаз Алматы қаласында өтетін Республикалық фестивальға жолдама алды.Сондай-ақ Түлекенова Ақмарал жетекшілігі арқасында Ұлттық аспап – домбыра бойынша Еркеназ Серікқали І-орынмен, Қуанышкүл Тілеулесова жетекшілігі аясында Ринат Жақсылық үшінші орын бйоынша мараптаталды.
Бірқатар музыкант мектеп оқушылары «Ансамбль номинациясы» бойынша, прима аспабы бойынша Нұрасыл Рахат, домбыра аспабы бойынша Әкімжан Бектемірұлы, қобыз номинациясы бойынша Салтанат Темірбай қатысқандары үшін арнайы сертификатқа ие болды.
Жас жеткіншектерді өнерге баулып, үлкен өмірге қанат қағуына аудандық өнер мектебінің қосқан үлесі зор. Талай жастың талабын ұштап жүрген өнерлі орданың бүгінде бағындырған белесі көп.
Дәл осы тұста аудандық Өнер мектебі ұстаздарына жас музыканттардың эстетикалық, адамгершілік және патриоттық сезімдерін тәрбиелеу, әлемдік және Отандық көркемөнер мәдениетінің дәстүрлеріне жеке қызығушылықтарын ояту барысында шәкірттеріне білім нәрін құя білген әрбір жеңістерімен құттықтап, абыройлы белес тілейміз!
Сыр елі өнердің тұнған мөлдір бұлағы болса, оның ішінде – Арал ұлттық дәстүрін, ән-күйі мен жыр термесін қайнар бұлағына сақтап қана қоймай, дамытып келе жатқан аудан. Кешегі Нұртуған шайырдан бастап, бүгінгі Айбек Тәңірбергенов өнердің өр шыңына жеткен мақтанышымызға айналды. Осындай өнерді сүйген өр тұлғалардың жолын қуушылар барда бұл өнер ешқашан өшпек емес.
Нұрай ӘМІРХАНОВА
