Көптен күткен пойыз жолға шықты

Ақтөбе мен көршілес Қазалының арасын жалғайтын №630 жолаушылар пойызы бүгін жергілікті уақытпен сағат 09:31 де Арал теңізі станциясына алғаш аялдады.

2 сәуірде арқадан бері қарай аяңдаған жолаушылар пойызын Арал қаласының әкімі және аудандық мәдениет және тілдерді дамыту бөлімінің басшысы бастаған, өнерпаздар мен жерлестер ерекше ықыласпен қарсы алып, жолаушыларға халқымыздың ұлттық асынан дәм ұсынды.

«Жолаушылар тасымалы» АҚ «Батыс» өңірлік филиалы 2024 жылдың қазан айында іске қосылған «Ақтөбе – Шалқар» пойызының бағытын Қазалы бекетіне дейін ұзартылғанын хабарлады.

Енді «Ақтөбе-Қазалы» пойызы Шалқар және Сексеуіл станциялары арқылы өтеді. Бастапқы кезеңде 6 вагон тіркеледі: үш купе және үш плацкарт. Болашақта жолаушылар ағыны көбейген жағдайда тағы төрт және одан да көп вагон қосу жоспарланып отыр.

Аралдан Ақтөбеге бару үшін билет құны плацкарт вагонында 4 935 теңге болса, купе 7 250 теңгені құрайды.

«Қазалы-Ақтөбе» бағыты бойынша №629 пойыз Қазалыдан тақ күндері сағат 18:20-да шығады, Аралға 20:20 келіп, 5 минут аялдайды. Келесі күні Ақтөбеге сағат 07:34-те жетеді.

Ал, «Ақтөбе - Қазалы» бағыты бойынша №630 пойыз жұп күндері Ақтөбеден сағат 22:25-те жүреді. Келесі күні Арал теміржол вокзалына сағат 09:31-де келеді.

Аудан әкімдігінің баспасөз қызметі