Толқын Арал аудандық қоғамдық-саяси газет
» » Жылдам әрі жеңіл

Жылдам әрі жеңіл

     Баланың туу туралы куәлігін алуды жеңілдету ісі өткен жылы Үкімет сағатында көтерілген негізгі мәселелердің бірі болатын. Бұл турасында еліміздің Ақпарат және коммуникациялар министрі Дәурен Абаев мемлекеттік қызметтердің ұялы телефон арқылы көрсетілетінін алға тартқан еді. Атап айтқанда, перзентханада сәби дүниеге келгеннен кейін оның ата-анасының телефон нөміріне бірқатар сұрақ жіберіледі. Туу туралы куәлікті алу үшін сәбидің аты-жөні мен басқа да мәліметтері сұралады. Өтініш беруші қажетті құжаттарын халыққа қызмет көрсету орталығынан алып кете алады немесе үйіне жеткізіп беру қызметін қолдана алады. Соған сай, «Азаматтарға арналған үкімет» мемлекеттік корпорациясы мен «Ұлттық ақпараттық технологиялар» АҚ 2017 жылдың 29 желтоқсанынан бастап бала туған ата-аналарға мемлекеттік қызметтерді проактивті тәсілмен көрсету жобасын жүзеге асыра бастады. Енді сәбилі болған тұрғындар SMS хабарлама арқылы туу туралы куәлік ала алады.
         Ақпараттық жүйелердің бірігуінің арқасында жаңа туған сәбиді тіркеу бойынша өтініш автоматты түрде келетін болады. Сонымен бірге, бала дүниеге келген күннен бастап, ата-аналар баланы тіркеу және басқа да қажетті барлық қызметтерді енді SMS хабарлама арқылы алады. SMS хабарлама алу үшін ХҚКО-ға барып, ұялы телефон нөмірлерін порталдағы жеке кабинеттеріне тіркетуі тиіс.
         Ауданымызда да SMS хабарлама арқылы нәрестелердің туу туралы куәліктерін алуға қол жеткізілуде. Жақында аудандық перзентханада жаңа тәсіл бойынша тапсырыс берген қала тұрғыны Зада Жаңатайға аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің жетекші маманы Е.Дабылова, инспекторы З.Оңғарова, сондай-ақ, ХҚКО қызметкері Д.Бисеновалар бірлесіп, кішкентай Нұрисламның туу туралы куәлігін табыс етті.
          Әрбір ана үшін сәбиінің өмірге аман-есен келуі зор қуаныш. Жаңа тәсіл арқылы алдымен құттықтау хабарлама келгенде бойымды бір тіктесем, құжатын алып тұрғанда ерекше қуандым,- деген жас ана сәбиінің туу туралы куәлігін жылдам әрі жеңіл жолмен алуға көмектескен қызметкерлерге ризашылығын білдірді.
Мая Жұмашова,
аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің бас маманы.
16 ақпан 2018 ж. 727 0