Толқын Арал аудандық қоғамдық-саяси газет
» » СЫБАЙЛАС ЖЕМҚОРЛЫҚПЕН КҮРЕС КҮШЕЙДІ

СЫБАЙЛАС ЖЕМҚОРЛЫҚПЕН КҮРЕС КҮШЕЙДІ

Бүгінгі таңда сыйбайлас жемқорлыққа қарсы күрес шаралары жоғарғы деңгейде жүзеге асырылып келеді. «Сыбайлас жемқорлыққа қарсы күрес туралы» Қазақстан Республикасының Заңы қабылданғалы бері заңнама аясында атқарылып жатқан жұмыстар нәтижесін беріп келеді десек те әлі де болса жең ұшынан жалғасқан заң бұзушылық, парақорлық фактілері көрініс тауып жатыр. Осы бағыттағы шараларды әлі де болса жандандырып, халық пен билік арасындағы сенімділікті арттыру мақсатындағы түрлі жобалар ұсынылып келеді. Солардың бірі – «Open Space» технологиясы.
Өткен аптаның сенбісі күні «Open Space» технологиясын кеңінен таныстырып, жан-жақты түсінік беру мақсатында аудан әкімдігінің мәжіліс залында Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының орынбасары – Әдеп жөніндегі кеңес хатшылығының меңгерушісі Берікбол Байхожаевтың қатысуымен басқосу болып өтті.
Аудан әкімінің орынбасары Б.Жұмағұловтың төрағасымен өткен жиында арнайы жұмыс сапарымен келген Берікбол Ұзақұлы баяндама жасады.
– Елбасы Жолдауында айқындалған мақсаттар мен міндеттерге сәйкес Сыр өңірінде «Ақмешіт – адалдық алаңы» жобасы қолға алынып, жобалық кеңсе жұмыстары басталып кетті. Сонымен қатар, көретілетін мемлекеттік қызметтерді толықтай электронды бағытта жүргізу шаралары белсенді түрде жасалып келеді. Мемлекеттік қызмет көрсету жұмыстарының ашықтығын қамтамасыз ететін «Open Space» технологиясы да сіздер үшін жұмыс жасайтын болады. «Б» корпусының лауазымына үміткерлерді тестілеу, конкурстарға қатысушылардың құжаттарын қабылдау барысында құжаттарды «E-gov» электронды үкімет порталы арқылы тапсыруға да мүмкіндік бар.  Бұл дегеніміз біріншіден сыбайлас жемқорлық әрекеттерінің алдын алу, оларды анықтау шараларының бірі десек, екіншіден қағазбастылыққа тоқтау қояды, – деді.
Жиын соңында басқосуға қатысқан қала, кент және ауылдық округ әкімдері мен мамандары, дербес бөлім басшылары, мектеп директорлары тарапынан ұсыныс-пікірлер айтылып, сұрақтарына жауап берілді.

Оңталап ЖОЛДАСОВ.
17 сәуір 2019 ж. 141 0