Толқын Tolqyn.kz ақпараттық агенттігі
» » Ағылшын тілінде әңгіме жазған оқушы АҚШ-қа барады

Ағылшын тілінде әңгіме жазған оқушы АҚШ-қа барады

АҚТАУ. ҚазАқпарат - Ақтау қаласындағы Назарбаев Зияткерлік мектебінің 11-сынып оқушысы ағылшын тілінде шығарма жазып, АҚШ-тағы оқу курсына жолдама алды, деп хабарлайды ҚазАқпарат тілшісі.Аспарух Сұлтанмұрат АҚШ мемлекеттік департаментінің білім және мәдениет бағдарламалары бюросының қолдауымен ұйымдастырылған «Желілер арасында: әлем және жазушылық тәжірибе» атты екі апталық бағдарламасының жеңімпаздарының бірі атанды. Сондай-ақ ол Айова университетінде биылғы жылдың 13-27 шілдесі аралығында өтетін курсқа жолдама алды. Ағылшын тілінің шеберлері мен жазушылық қабілеті бар балалардың басын қосатын оқу курсына 15-18 жастағы 30 жас іріктеп алынған.«Бағдарламаға қатысу үшін алдымен, байқауда өз қабілетіңді дәлелдей алуың керек. Ол үшін әртүрлі тақырыпта ағылшын тілінде эссе жазу және 6-8 беттен тұратын проза немесе поэзия жазу тапсырмалары берілді. Тарих пәніне қызығушылығым жоғары болғандықтан тарихи оқиға желісіндегі драма жазуды ұйғардым. «The Crimson Glow of Spring» атты шығармамда ресей-француз соғысында әке-шешесінен айырылған баланың тағдырын суреттедім. Ол сурет салуды ұнатады және өзгелердің айтқанына қарамастан сүйікті ісімен айналысуды тоқтатпайды»,- дейді Аспарух.
Оқушы ағылшын тілін үйренгенді ерекше жақсы көреді. Өйткені, көптеген пайдалы деректерді түпнұсқада меңгеру арқылы біршама мүмкіндіктерді алуға болатынын есептейді. Жеңімпаздың тілді меңгерудегі білімін арттыруда ағылшын тілі пәні мұғалімі Нұрзада Ермағамбетова мен шет тілі мұғалімі Jacob Labuschagne көп еңбек сіңірген. Зияткер биылғы жылы IELTS емтиханынан 6,5 балл жинаған.
«Бағдарлама маған өте пайдалы болатынына сенімдімін. Өйткені АҚШ-қа сапар естен кетпес әсер мен тіл меңгеруге тамаша мүмкіндік сыйлайтынына үміттенемін. Курс барысында алған білімімді шетелдік университеттерге білім грантына үміткер болғанда барынша пайдаланамын. Аталған байқауда техникалық тұрғыдан көмек білдірген мектебіміздегі кәсіби бағдар беру жөніндегі кеңесші Сауле Алдабергеноваға, тіл меңгеруге көмек көрсеткен барша ұстаздарыма алғыс білдіремін, - дейді жас қаламгер.
reactor.inform.kz/
13 мамыр 2019 ж. 709 0