Диплом табысталды
Болашаққа бағыт алған жас мамандардың тағы бір легіне бүгін диплом табысталды. Арал индустриалды-техникалық колледжінің бітіруші түлектері диплом алды. Аудандық мәдениет үйінде ұйымдастырылған салтанатты шара жылдағысынан ерекше мазмұнда өрілді.–Сіздер дәл осы күні қимас бір мекендеріңізге айналған, балдәурен шақтың қызығын өткере жүріп, бойға білім нәрін жинаған колледжден үлкен өмір белесіне қадам басқалы отырсыздар. Осы жолда қолдарыңыздағы диплом өмірлік азық болады деп сенемін, – деді шарада сөз алған колледж директоры Нұралы Әбішев.Іргелі білім ордасы қоғамға қажетті мамандықтар дайындайды. Шара барысында электргазбен дәнекерлеуші, байланыс құрастырушы, кабельші, ағаш ұстасы мамандықтары бойынша бітірген түлектерге диплом табысталды.
–Біз үшін бүгінгі күн ерекше. Жүректе қимастық пен қуаныш сезімі қатар тулап тұр. Себебі 3 жыл ішінде білім ала жүріп, әдептілік пен ізгілікті бойға сіңірдік. Білікті ұстаздардан білім алып, жақсы дос таптық. Енді міне, диплом алып, маман атанып отырмыз, – деген бітіруші түлек Нұрсәуле Елемесова ақжарма тілегін жеткізді.
Сондай-ақ оқу жылында қоғамдық жұмыстарға белсене қатысып, білім сайыстарында бақ сынаған студенттер мен ұстаздар Алғыс хатқа ие болды. Өз кезегінде арнайы келген қонақтар сөз сөйлеп, түлектерге сәттілік тіледі. Кеш соңы бітірушілердің концерттік бағдарламасына жалғасты.
Н. Марат
