Мектепке жол акциясы жалғасуда

    Жаңа оқу жылының қарсаңында кей ата-аналар үшін балаларын мектепке толық дайындау ауырлық келтіріп жатады. Себебі, нарықтық заманда бәрі қаржыға келіп тірелетіндіктен. Елімізде әлеуметтік аз қамтылған отбасы балаларын мектепке дайын етіп, қажеттілігіне сай қолдау көрсететін «Мектепке жол» акциясының дәстүрге айналғанына да қаншама жылдың жүзі болды. Үстіміздегі жылдың 3 шілдесі мен 30 қыркүйегі аралығында өтіп жатқан дәстүрлі акцияның жалғасы жақында аудандық мәдениет үйінде өтті.   

    Аудан әкімі М.Оразбаев балалар көңіліне қуаныш сыйлайтын «Жүректен жүрекке» атты ұранымен жалғасқан мектепке жол акциясына қатысты. Айта кету керек, аталған акция дәстүр бойынша 3 шілде мен 30 қыркүйек аралығында жалғасын табады. Осы кезге дейін түрлі білім ошақтары мен кәсіпкерлердің қолдауы негізінде жалғасып келе жатқан акцияда аудан бойынша барлығы 970 оқушыға оқуға қажетті құрал-жабдықтар және мектеп формалары үлестірілген. Міне, бүгін сол игі бастаманың жалғасы ретіндегі шарада 126 оқушы аудан әкімінің қолынан өздеріне қажетті оқу құралдарын алды.
    Мұндай бастамаға мұрындық болған елдегі мекеме ұжымдары мен кәсіпкер азаматтар осылайша дәстүрлі жолды жыл сайын жалғауда. Аталған шарада қайырлы істі қолға алып, көптеген бүлдіршіннің көңіліне қуаныш сыйлап, жомарттығымен елге танылып жүрген азаматтарға аудан басшысы ризашылығын білдірді.
А.Бисенов.