Umai-2023: Бақ пен бап
Елімізде Umai-2023 Ұлттық сыйлығына қатысуға өтінім қабылдау басталды. Айтулы шығармашылық табыстары мен үздік жетістіктері үшін кәсіби шығармашылық ұжымдар мен жекелеген өнер қайраткерлерін қолдауға бағытталған байқау осымен екінші рет өткізіліп отыр. Айта кетейік, Мәдениет және ақпарат министрлігінің қолдауымен, биыл сыйлықтар мен жалпы жүлде қоры едәуір ұлғайды.Өтінім қабылдау «Театр өнері», «Музыкалық-орындаушылық өнер», «Хореографиялық өнер», «Бейнелеу және сәндік-қолданбалы өнер» тәрізді төрт негізгі аталым бойынша өтеді. «Театр өнері» аталымы бойынша сегіз жүлде белгіленген: «Опера өнері» (операдағы ерлер және әйелдер партиясын үздік орындау), «Актерлік шеберлік» (драмалық немесе музыкалық-драмалық спектакльдегі: оперетта, мюзикл, рок-опера, музыкалық комедиядағы үздік ер адам және үздік әйел адам рөлі), «Үздік режиссура» (музыкалық-драмалық немесе драмалық спектакльдегі режиссерлік жұмыс), «Спектакльдің үздік көркемдік безендірілуі» (костюмдер және/немесе декорациялар), «Үздік музыкалық-драмалық спектакль» (опера, драмалық/музыкалық-драмалық (оперетта / мюзикл / рок-опера / музыкалық комедия), «Үздік драмалық спектакль / музыкалық комедия». Ал «Хореографиялық өнер» аталымы бойынша алты жүлде белгіленген: «Үздік би ұжымы» (халықтық, заманауи немесе эстрадалық би ансамблі), «Үздік заманауи хореография спектаклі», «Балеттегі үздік орындаушы» (балет солисі /ер/ әйел), «Үздік хореограф», «Үздік классикалық балет спектаклі». Тағы төрт жүлдені жеңімпаздар «Музыкалық-орындаушылық өнер» аталымы бойынша алады: «Үздік дәстүрлі орындаушы (ән айту)», «Үздік дәстүрлі орындаушы (аспапшы)», «Үздік музыкалық ансамбль» (классикалық), «Үздік музыкалық ансамбль» (халықтық). «Бейнелеу және сәндік-қолданбалы өнер» аталымы бойынша жүлде «Үздік сәндік-қолданбалы өнер шеберіне» мынадай санаттар беріледі: қолөнер шебері (зергерлік өнер, металл өңдеу, эксперименттік/аралас техникалар), қолөнер шебері (ағаш өңдеу, көркем ою, керамика), қолөнер шебері (киіз, текстиль, тоқымашылық, былғары). «Үздік бейнелеу өнерінің туындысы» үшін тағы төрт сыйлық тағайындалады, атап айтқанда, «Үздік кескіндеме шебері», «Үздік заманауи өнер суретшісі (перформанстар, инсталляциялар, арт-нысандар), «Үздік графика шебері» және «Үздік мүсін шебері». Биыл «Үздік балалар спектаклі» (екі сыйлық) арнайы жүлделермен атап өтіледі, сондай-ақ тәуелсіз сараптау комиссиясының мүшелері финалистердің арасынан сахналық өнер саласында «Жыл жаңалығын таңдайды. Шығармашылықта жаңашыл бетбұрыс жасаған және елімізде, сондай-ақ шетелде театр саласындағы өздерінің жарқын бірегей жетістіктері арқылы танымал болған, жасы 40-тан аспаған сахна өнерінің шеберлері «Жыл жаңалығы» жүлдесіне үміткер бола алады. Ұжымдар мен орындаушылар 2021 жылдың қыркүйегінен бастап 2023 жылдың шілдесіне дейінгі театр (концерттік) маусымында атқарған жұмыстары үшін Umai-2023 сыйлығының иегерлері атанады. Жекелеген өнер қайраткерлері (опера солистері, драма актерлері, режиссерлер, суретші сценографтар, костюмдер бойынша суретшілер, балет солистері, хореографтар, музыкалық орындаушылар) екі жылдан аспайтын мерзімде, яғни 2021 жылдан 2023 жылға дейін орындаған рөлдері/партиялары/шығармашылық жұмыстары/музыкалық бағдарламалары үшін бәйгеге түседі. Суретшілер мен сәндік-қолданбалы өнер шеберлері де 2021 жылдан ерте емес кезеңде жасалған жұмыстары үшін үміткер бола алады. Өтінімдерді қабылдау 2023 жылдың 5 желтоқсанында аяқталады.
egemen.kz
