“Біздің Бейсен” атты кітап жарыққа шықты
Түркістан қаласында журналист Бейсен Құранбек туралы естеліктер жинақталған "Біздің Бейсен" кітабының таныстырылымы өтті. Бұл туралы Түркістан облысы әкімінің баспасөз қызметі хабарлады.Жинақта танымал ел ағаларының естелігі, замандастарының толғаныстары, ақындардың арнау жырлары, қарапайып көрермендердің ыстық ықыласы мен сағынышы топтастырылған.Қоғам қайраткеріне арналған туындының тұсаукесері Түркістан облысындағы әріптес, дос, замандастарының басын қосты. Халқының жанына жалау болған Бейсеннің болмысын танытатын оқиғаларды еске алып, әсерлі естеліктердің тиегін ағытты. Ахмет Ясауи атындағы халықаралық қазақ-түрік университетінің ғылыми кітапханасында өткен рухани жиынға университеттің журналистика кафедрасының белсенді жастары қатысты.
Еркін форматта өткен кездесуде сөз алған Бейсен Құранбектің курстасы, ҚР Журналистер одағының Түркістан облыстық филиалының төрағасы Ғалымжан Елшібай Ясауи атындағы халықаралық қазақ-түрік университетінің журналистика кафедрасының студенттеріне Бейсен Құранбек атындағы 3 стипендия тағайындалатынын жеткізді.
Кездесу соңында “Біздің Бейсен” естелік кітабы университет кітапханасына және журналистика кафедрасына сыйға берілді. Жинақ қазақ елінің біртуар перзенті, тележурналистика тарланы – Бейсен Абайұлы Құранбекті құрметпен еске алушы қалың көпшілікке арналған.
