Жұлдыз болып жарқырап тұр көгімде!
Өткен күнде белгі бар. Теңіз тарланына баланған Зейнолла Шүкіров ел есінде екені баршаға аян. Осынау аяулы ақынның әр жылдарда туған күнін атап өту барша аралдықтардың қасиетті парызы. Біз Зейнолладай біртуар тұлғаның замандасы әрі рухани сырласы бола білген Мұрат Сыдықовпен тілдесіп, көз көрген жанның тірліктегі болмысы жайында сыр суыртпақтадық. Өмірін – өнерім деп жүрген Қазақстанның еңбек сіңірген қайраткері сонау бір жылдары Зейнола Шүкіровтің 70 жасына арнаған өлеңін тарту етті. Айта кететін бір жайт, «Кіндігім бірге Аралмен, теңізден тыныс алам мен» деп жырлаған ақынға арналған бұл арнауды патша көңілді оқырман назарына ұсынып отырмыз.
Редакциядан
Елдің нұрын мақтайтын да ақындар.
Адалдық пен әділдікті ту етіп,
Тек шындықты жақтайтын да ақындар!
Дандайсыған пенделерді бұқтырып,
Өмір сырын ұрпақтарға ұқтырып,
Ел мүддесін жырлап жүрген ақынды,
Қалың қазақ сыйлап өткен тік тұрып!
От жырымен кәріге де, жасқа да,
Жылу берген жансыз қара тасқа да.
Ерекше бір парасатты ақын бар,
Болмысымен ұқсамайтын басқаға!
Киелі Бөген топырағынан жаралған,
Қасиетті Арал тереңінен нәр алған.
Ол аяулы азамат ақын Зейнолла –
Тұла бойы лаулап жанған жыр-арман!
Жасынан-ақ жасықтарға қосылмай,
Тағдыр салған ауыр дертке жасымай.
Болашаққа жырдан күмбез орнатып,
Нөсерлетіп ағып өтті жасындай.
Кейде жаны қиналғанда тұралап,
Халқы болды оған демеу, саябақ.
Дара туған қайталанбас перзентін,
Көтерді кезек алақанда аялап.
Періштесі махаббаттың жыр-гүлі,
Шыдам, жігер, қайсарлыққа боп үлгі.
Қазағымның Корчагині атанған,
Қайран, Зәкең 70 жаста бұл күні!
70 жасын тойлайық кел, ағайын,
Мен ортаңда дәнекерің болайын.
Жауһар жырын тарту етіп бәріңе,
Ақ қанатты «Сағыныш» әнге салайын.
Зейнолладай ақын берген еліме,
Туған жердің топырағы тегін бе?!
Мәңгі өлмес ақ шағала жырлары,
Жұлдыз болып жарқырап тұр көгімде!
Кітабыңды ашқанымда сағынып,
Ақын аға, кеудемнен жыр ағылып.
Домбырамды қолыма алып толғанам,
Асыл аға, құдіретіне табынып!
Мұрат Сыдықов,
Қазақстанның еңбек сіңірген қайраткері,
«ҚҰРМЕТ» орденінің иегері, Қазақстанның Мәдениет
қайраткері, Арал ауданының құрметті азаматы
