Аралдық сол ақсақалдарға ризамын
Өнер деген – бәсеке, өнер деген – айтыс, тартыс. Сондай есте қаларлық оқиғаның бірі ілгеріде Арал ауданындағы бір байқауда байқалды.
Бәрін басынан бастайын: Қазір нақ қай жылы екені есімде жоқ. Үгіт бригадаларының кезекті облыстық байқауы Арал ауданында өтетін болды.
Адамның қиялына шек жетеме?! Үгіт бригадасының сценарийін жазу, оның режиссерлік қойылуы менің мойнымда. Бәсекеде өз мүмкіндігімізді ашып көрсетіп, озық болу үшін барынша тыңғылықты дайындалдық. Алдымен «Бәйгеқұм» стансасындағы «Ханқожа» су қоймасы көліне барып, катер жалдап арнайы түсірілім жасадық. Оны әуенмен әрлеп, тіптен тартымды етуге бар күш-жігерімізді салдық. Осылайша, сақадай сай болып, артынып-тартынып Аралға да жеттік.
Өтетін шара аудан басшыларының қатысуымен рәсімделіп, салтанатты түрде ашылды. Барлық аудандар кезекпен өнерлерін көрсетіп жатыр. Кезек бізге де келді. Біз өнерімізді бірінші дайындап келген түсірілімнен бастадық. Экрандағы көрсетілім: Теңізде жүзіп келе жатқан катер. Катер үстінде капитан. Ол қолына дүрбісін алып алыс көкжиекке қарап тұр.
Сұрақ қойылады:
– Капитан, Арал қаласы көріне ме?
Капитан: – Қайдам, жағалау көрінеді. Бір қызбен жігіттің ескерткіші тұр.
– Тағы не бар?
– Бір үлкен «жұмыртқа» көрінеді.
– Онда келдік Аралға! Қыз бен жігіт – ол Қыз Жібек пен Төлегеннің ескерткіші! Ал үлкен жұмыртқа ол «Жұмыртқа» деп аталатын спорт сарайы.
«Жүріңдер кеттік сахнаға» деп сахнаға шығып дайындап барған өнерімізді көрсетіп шықтық. Залдағы көрермендер арасында қол соғып бізді қолдап отырды. Не көрсеткенімізді тәптіштеп созбай-ақ қояйын. Көрермен қол шапалағы мен ықыласынан сәтті қойылым болғаны аңғарылды. Қызық «әділ» деген сөзден басталатын қазылардың шешімінен кейін басталды.
Жүргізуші қыз қазылар шешімін хабарлап, соңғы жағында үшінші, екінші орындарды атап болып І орын – Шиелі аудандық мәдениет бөлімінің ұжымына беріледі дегенде бүкіл зал гүрілдетіп қол соқты. Жүргізуші әрі қарай сөзін жалғастырып, «Бас жүлде» Арал ауданына беріледі деп салтанатты түрде хабарлаған кезде, бір-екі адам қол соқты да тез басылып қалды. Үнсіз өлі тыныштық орнады. Тым-тырыс, тыныштықты залдың орта жерінде отырған бір қария бұзып, «Бұл дұрыс емес, бас жүлде Шиеліге берілуі керек!» дегенде бүкіл зал шулап қоя берді.
«Бұларың дұрыс емес, бас жүлде жақсы өнер көрсеткен Шиелінікі» дейді көпшілік. Осылай зал көтеріліп, айқай-шу асқынып бара жатқанда бір басшы жүргізуші қызға «Тез аяқта!» деп әмір берді.
Не істерін білмей тосылып тұрған қыз да іле-шала «Үгіт бригадаларының облыстық байқауы осымен аяқталды. Хош-сау болыңыздар!» деп микрофонды сөндірді. Залдағы көрермендер сонда да басылған жоқ. «Сендердікі дұрыс емес» деп толқып-толқып әрең басылды. Өйткені олардың сөзін тыңдайтын азаматтар сахнаны тастап шыққанша асықты. Біз елмен, аралдықтармен үнсіз қоштасып, автобусымызға отырып, Шиеліге қарай бет алдық. Көлік іші үнсіз, тым-тырыс, тыныштық. Бәрінің көңіл-күйі түсіп кеткен. Сәлден соң біреуі сөз бастап:
– Бұл дұрыс болмады, – деп ренішін білдірді. Оған үнсіз отырған басқаларда өкпесін айта қосылды. Орталарында үлкені өзім болған соң жігіттерге басу айттым:
– Жігіттер, ренжімеңдер. Қазір Шиеліге барғанда сендерден «Бас жүлде алдың ба?» деп сұрамайды. «Нешінші орын алдың?» деп сұрайды. Бас жүлде орын емес, ол – жүлде, жай ғана жүлде. Ал біз бірінші орын алдық. Бас жүлде – орын емес, жай жүлде ғана, – деп жігіттерді жұбатып, сабасына түсірдім.
Сондай шешуші сәтте шындық үшін, әділдік үшін намыстанып, өздеріне бұра тартпаған Арал ауданы ақсақалдарына, көрермендеріне ризамын! Оларға Шиелі халқы атынан, халықтың көңілін көтеріп, қыс демей, жаз демей, қытымыр қыста мұздаяқ болып, жазда шілденің ыстығына күйіп, жай таңдамай, күй таңдамай елге қызмет етіп жүрген мәдениет қызметкерлерінің атынан ыстық ықыласыммен рақметімді айтамын!
Осы оқиғаға куәгер көзі тірі қариялар болса, ардагерлердің бір басқосуына арнайы шақырсаңыздар, мен сіздерге қызмет етуге әзірмін. Өйткені сіздердей туралығын айтып, әділдік үшін күресер адамдар қашанда сыйлы, елге үлгі!
Әлмырза НОҒАЙБАЕВ,
әнші, термеші, сазгер,
ҚР еңбек сіңірген қызметкері,
«Құрмет» орденінің иегері,
Шиелі ауданының Құрметті азаматы
