«Жүрегім – ай, жаным – күн»
Сырдың сыршыл перзенті, айтыс өнерінде айқын қолтаңбасы бар, ақын, республикалық «Шабыт» фестивалінің алғашқы лауреаты, ұстаз, педагогика ғылымдарының магистрі Айнагүл Әбуованың мерейтойына арналған «Жүрегім – ай, жаным – күн» атты шығармашылық кеші А.Тоқмағамбетов атындағы Мәдениет үйінде өтті.Кеш тізгінін ұстаған талантты ақын, республикалық жас жазба ақындар дуэлінің жеңімпазы, «Күміс қалам» жүлдесінің иегері Ақжол Түменбай көрермен қауымды мерейтой иесі Айнагүл Әбуованың өмір жолы мен шығармашылығынан хабардар етті. Сондай-ақ қалалық Жастар театрының дайындаған қойылымында ақын қыздың бала күнінен балауса шағына дейінгі болмысы көрініс тапқан.
Кеште мерейтой иесіне Парламент Сенатының төрағасы Мәулен Әшімбаевтың, Сенаттың аппарат басшысы Максим Споткайдың және «Музыкалық жас көрермен» театрының директоры Асхат Маемировтың құттықтау хатын «Дарын» мемлекеттік жастар сыйлығының лауреаты, танымал актер Асылхан Төлепов, облыс әкімі Нұрлыбек Нәлібаевтың құттықтауын мәдениет, архивтер және құжаттама басқармасы басшысының орынбасары Қуаныш Жанұзақов табыс етті. Қала әкімі Нұржан Ахатовтың, ақынның туған жері Арал ауданының әкімі Аманжол Оңғарбаевтың, облыстық мәдениет, архивтер және құжаттама басқармасы басшысы Жанмұрат Сейіловтің, Қорқыт ата атындағы Қызылорда университетінің басқарма төрағасы-ректоры Бейбіткүл Кәрімованың, Н.Бекежанов атындағы қазақ академиялық музыкалық драма театры ұжымының, «Айтыс ақындары және жыршы-термешілердің халықаралық одағы» филиалының атынан да құттықтаулар оқылды.
Мұнан соң Айнагүл Әбуованың «Жасыл сия» атты жыр жинағының тұсауы кесілді. Білім беру ісінің үздігі Алтынбек Ерназаров, режиссер-сценарист, ақын Оңталап Нұрмаханов және ұстаз, Мәдениет қайраткері Серік Ыдырысов ақынға ақ тілек арнады.
Кеш қонағы, ҚР Еңбек сіңірген қайраткері Елмұра Жаңаберген әндер шырқап, елдің қошеметіне бөленді. Шолпан Бимбетова А.Әбуованың сөзіне жазылған Е.Әбдіхалықованың «Барады жылдар жылжып…» әнін орындаса, белгілі жырау, Мәдениет қайраткері Руслан Ахметов тыңдарман қауымға А.Әбуованың «Сыр елі» толғауын тарту етті.
Мерейтой иесі, ақын Айнагүл Әбуова «Жасыл сия» кітабынан жыр оқыды.
Ғазиза ӘБІЛДА,
«Сыр бойы»
syrboyi.kz
