Сахнаға сән берген Самал

«Ел іші – өнер кеніші». Аудан орталығынан онша алыс емес Тоқабай деген ауыл бар. Кезінде мал шаруашылығы мен көпке танылған аталмыш мекеннен талай дарындар қияға қанат қаққан. Бүгінгі тақырыбымызда байланыс саласында ұзақ жыл еңбек еткен Бершімбай мен мектепте мұғалім болған Ақкенженің үкілі үміті төңірегінде өрбімек.

         Бас тақырыпта тілге тиек еткеніміздей, сахнаға сән берген Самал жайында көпшілік жақсы біледі. Оның өз ісіне деген адалдығы, көрерменді тәнті еткен әсем дауысы өнер сүйер қауымға мәлім. Қашан көрсеңде күлімсіреп, ән десе қамшы салдырмайтын осынау жанның мәдениеттегі өлшеусіз еңбегін Мемлекет басшысының Жолдауында айтылған еңбек адамдарын дәріптеу бастамасы аясында қаузауды жөн деп таптық. Сонымен Самал Дінжанованың жүріп өткен жолын патша көңілді оқырман назарына ұсынып, жетістіктерін жіпке тізейік.

         Армансыз адам қанатсыз құспен тең. Қырдың қара қызы арманға қанат байлап өсті. Алақандай ауылдағы №248 орта мектептен сапалы білім, саналы тәрбие алған ол көршілес Ақтөбе облысында музыкалық колледжде прима аспабы бойынша мамандық еншіледі. Кейіннен Қызылорда қаласындағы Маметова атындағы колледжде білімін жетілдіріп, сол оқу ордасынан мәдени ұйымдастыру факультетін қызыл дипломға тәмамдап шығады. Аудандық мәдениет үйіне 1993 жылы әнші ретінде жұмысқа қабылданды, міне сонан бері табан аудармай 33 жыл аралдықтарды әнмен сусындатып, сахна ажарын айшықтап келеді. Бойында тек әншілік қасиет қана емес, сахналық шеберлік те қалыптасқан Самалдың талай мәрте спекткальдерде талай кейіпкердің бейнесін шебер сомдап, өнер көрсеткенін көріп жүрміз. Көрермен біткен сөз еткен кейіпкеріміздің қойылым аяқталған соң оның актерлық қабілетіне тәнті болып, ризашылықтарын білдіргенін байқағанбыз. Бұл енді өз алдына бөлек әңгіме.

Мәдениет саласындағы дамылсыз еңбек абыройға бастаған Самал 1996 жылы облыстық Роза Бағланова атындағы әншілер байқауында Бас жүлде иеленіп, «сен тұр, мен атайын» деген қаншама мықтыларды шаң қаптырды. Қарқын мұнымен тоқтамады. Ақтөбе облысы, Ырғыз ауданында өткен республикалық әншілер байқауында да абыройы асып, мерейі тасыды. Яғни, күллі Қазақстан бойынша жүлделі екінші орынды қанжығаға байлады. Әншілік және сахналық шеберлігімен дараланған Тоқабайдың тумасы еліміздің түкпір-түкпірінен Ақтөбеге келіп, бағын сынаған театр байқауында «Үздік әйел» номинациясына қол жеткізіп, өткен жылы «Жыл үздігі» атанды.

         Қазіргі таңда «Ақ желкен» мәдени-демалыс кешенінің меңгерушісі болып еңбек ететін жезтаңдай әнші ауданның қандай да бір шарасы болсын төбе көрсетіп, аталған бастаманың көрігін қыздырып жүреді. Өз ісіне адал, тапсырылған істі асқан жауапкершілікпен орындайтын Самалдың дара дарынымен отбасы мүшелері ғана емес, барша аудан халқы мақтанады. Бір саланың көкжиегін кеңейтуге барын салып, суығына тоңып, ыстығына күйген мәдениеттің нағыз жанашырына әрқашанда шығармашылық табыс, отбасының амандығын тілейміз.

А. ЖАЙШЫЛЫҚ

Фото: автордан