Жаңылғанның тәттілері жайнатады дастарқанды

Елімізде кәсіпкерлік саны жыл сайын артып келеді. Оның ішінде жастардың кәсіпкерлікке бет бұруы соңғы жылдары көптеп кездеседі. Олар табыс тауып қана қоймай, ел мүддесі үшін де жұмыс жасауда. Халық қажеттілігін өтеп жүрген жас кәсіпкерлердің табысқа жетудегі қажыр-қайратына қарап қайран қаламыз. Арал ауданында жыл сайын өз кәсібін бастап, тәуір табыс тауып отырған жандар саны артпаса кеміген жоқ. Мұның бәрі мемлекет қолдауының арқасы. Бүгінгі мақалаға мемлекеттен грант жеңіп алып, өз кәсібін дөңгелетіп отырған жеке кәсіпкер Жаңылған Байымбетова арқау болмақ. Жаңылған 1996 жылы Арал қаласында дүниеге келген. Негізгі мамандығы – гиробиолог. Алматы қаласындағы Әл-Фараби атындағы ҚазГУ-дың биология және биотехнология факультетінің түлегі. Өзінің айтуынша, тәтті торттар жасауға деген қызығушылығы студенттік жылдардың соңғы курсында ояна бастаған. Осылайша ол қаладағы тәтті өнімдер шығаратын цехтың шеберінен арнайы дәріс алып, өнімді дайындаудың қыр-сырын үйренген.
– Бастапқыда отбасылық қуаныштарды артық шығын шығармайын деп дастарқанға қоятын тәттілерді өзім жасап жүрдім. Кейін жақындарым тапсырыс бере бастады. Олардан басқалар естіп жасап беруімді өтінді. Осылай тапсырыс берушілер қатары көбейе берді. Содан неге осы ісімді кәсіпке айналдырмасқа деген ой келді. Алдымен «Атамекен» кәсіпкерлер палатасында оқып, кәсіп ашудың алғашқы алгоритмдерін үйрендім. Сосын кәсіпкерлерге арналған мемлекеттік конкурсқа қатысып, 1 млн 200 мың теңге көлемінде қайтарымсыз грант иелендім. Бұл қаражатқа кондитерлік тәттілер пісіруге қажетті құрал-жабдықтар сатып алдым,– деген Жаңылған кәсібін қалай бастағанын айтып берді.
Ол 2018 жылы бір әулеттің келіні атанды. Сол кезден бастап кондитерлік тәттілерді тұрақты істеп келеді. Өзінің тұрақты тапсырыс берушілері де бар. Заманмен үндесіп тәтті өнімдерін де түрлендіріп отыратын Жаңылған осылай отбасылық қаражаттың еселенуіне өз үлесін қосып жүр.
– Кондитерлік өнімдерді пісіру біреуге оңай сияқты көрінеді. Шын мәнінде аса мұқияттылықты талап етеді. Бір тәтті өнімді пісіру үшін оған қосылатын қоспаның бәрін өз ретімен, мөлшерінде қосу қажет. Кішкене мөлшерден асып не кем қылсаң бәрі еш кетеді. Ал осыны табыс көзіне айналдырып отырған біздер үшін бұл шығын болып табылады, – дейді Жаңылған.
Сүйікті ісін кәсібіне айналдырған пысық келіншектің қолынан шыққан тәттілер тіл үйірмей қоймайды. Бағасы да қалтаға қонымды. Ол мемлекет қолдау жасап кәсібімді ашып, нәпақа табуға мүмкіндік жасаған соң өз өнімдерімді халыққа тиімді бағада ұсынамын дейді. – Қазір еңбек етемін деген адамға қолдау көп. Бір істі қолға алсаң, үкімет тегін ақша ұсынып жатыр. Кәсібіңді кеңейтемін десең, аз пайызбен несие береді. Мұның бәрі бізді жұмыссыз қалдырмаудың қамы. Сондықтан қазір нан табуға мүмкіндік көп. Тек ерінбей-талмай ізденсең болғаны, – дейді жас кәсіпкер.
Жаңылған өзі ата-енесіне қызмет етіп, жолдасының жағдайын жайлы етіп бір үйдің шаруасын ширатып отырған келін. Және оған қоса уақыт тауып тапсырысқа тәтті торттар дайындап жүрген кәсіпкер.
– Қазір тапсырысты үйден қабылдап жасаймын. Алдағы уақытта кондитерлік тәттілер дайындайтын цех ашқым келеді. Сол үшін еңбектеніп жатырмын. Өзіме артылған сенімді ақтап, кәсіпкерлік саласында табысқа жетуді мақсат етіп жүрмін, – дейді Жаңылған Тағыбергенқызы.
Бүгінгі кейіпкеріміз іс қыламын деген жанға мүмкіндіктің мол екендігін дәлелдеп бергендей. Әрине кедергілер де, күрмеулер де болуы мүмкін. Бірақ табысқа жетемін деген адам қиындықта сынбай қарсы тұрса түбінде бәрін мойындатары сөзсіз.
Н. МАРАТҚЫЗЫ