Жемісті еңбек абыройлы етпек

Жіңішкеқұм ауылдық округінің орталығы саналатын Тоқабай ауылында іргелі білім ұясы бар. Осы жерде қаншама шәкірттерге тура жол нұсқап, қияға қанаттандырған ұстаздар еңбегі өлшеусіз. Ғибратты ғұмырын игі іске арнаған мұғалімдердің арасында Бақыткүл Мақсұтқызының орны ерекше аталады. Ол 1962 жылы Арал қаласында дүниеге келіп, ата-анасымен тілеулес ағайынды қуанышқа кенелткен. Тұлымшағы желбіреген жеткіншек аудан орталығындағы №15 орта мектебінде оқып, алғырлығымен озаттар қатарынан табылды. Мектеп қабырғасында жүріп, ізденімпаздығымен дараланған Бақыткүл білімнің теңіз екенін жан-тәнімен ұғынды. Осылайша, соңғы қоңырау соғылған сәттен кейін үлкендердің ақ батасын алып, Арқадағы Жезқазған өңіріне бет түзеді. Арманы асқақ бойжеткенді тағдыр арқадан қақты, қолдады, қоштады. Жезқазған қаласындағы педагогикалық институттың жаратылыс тану – география факультетіне оқуға түсіп, аталмыш білім ордасын 1984 жылы тәмамдаған жанның өнегелі өмірі аралдық педагогтарға айдай анық болса, адами қасиеті өзі тірлік кешкен тоқабайлықтарға тіптен таныс-тұғын.

Иә, біз тақырыпқа арқау еткен Бақыткүл Ниязованың салиқалы жолы осылай өрбиді. Кеңес дәуірінде жалындаған жастар ешқашан назардан тыс қалмаған сонау Жезқазған асып, жоғары білімді маман атанып келген Бақыткүлді 1984 жылы №248 орта мектебі өз баласындай қарсы алып, алғашқы нанның дәмін татқызды. Осы жерде білім саласының көкжиегін кеңейтуге сүбелі үлес қосып, жауапкершілігі мол жұмыстың ыстығына күйіп, суығына тоңған Бақыткүл сенімге селкеу түсірмей, аманатқа адалдық танытты. Ата-аналар қауымы көздің қарашығындай ұл-қызын осы кісіге беруді қолайлады.

Мұғалімдіктен сатылап өскен еңбекқор жан бір жылдары директордың оқу ісі жөніндегі орынбасары қызметін де атқарды. "Алтын белгі", "Үздік аттестат" дайындаудағы жетістігі алақандай ауылдың абыройын асқақтатты. Мектеп бітірген түлектердің басым бөлігі жоғары оқу орындарының грантын иеленсе, онда Бақыткүлдің қолтаңбасы бар екендігін жергілікті жұртшылық жақсы ұғынды.

Жалпы, еткен еңбектің еленгені жақсы. Жас маман болып, бір салада бір жерде зейнет жасқа жету екенің маңдайына жазыла бермейтін бақыт! Шүкір, перзенттері де қоғам дамуына үлес қосып, қалтықсыз қызмет етіп келеді. Шаңырақтың шынары, берекелі отбасының ұйытқысы облыс, аудан көлемінде марапатталып, іс-тәжірибесі кейінгі буынға кеңінен насихатталғанының өзі үлкен мәртебе. Ендеше, саласының дарабозы ретінде танылған ұстазға:

Ыбырайдың ісін жалғаған,

Мұғалімге қарыз барша жан.

Еңбегіңізге еткен ел риза,

Абыройыңыз артсын әрқашан, – деп риясыз пейілмен ақжарма тілек білдіреміз.

Айгүл ҚАЛХАМАНОВА,

№248 орта мектеп директорының тәрбие жөніндегі орынбасары