Адалдықтың маңызды өлшемі – еңбекқорлық пен кәсіби біліктілік. Мемлекет басшысы Қасым-Жомарт Тоқаев Ұлттық құрылтайдың «Адал адам – Адал еңбек – Адал табыс» атты үшінші отырысында өз кәсібін өте жақсы білетін, оған әбден берілген еңбекқор адам ғана табысқа жете алатынын айтты.«Адал еңбек етіп, адал табыс тапқан адам жетістікке жетеді, құрметке ие болады. Ұлы Абай «Адал еңбекпен мал іздемек – арлы адамның ісі» деген. Ал арлы адам әділетсіздік жасамайды. Әр салада адалдық басты орында тұрса, әділ қоғам орнайды», – деп атап өтті ел Президенті.Ал қазақ ақыны Шәкәрім Құдайбердіұлы: «Бәріне қанағат қыл да, еңбек ет» деген болатын. Елімізде адал еңбегімен, маңдай терімен, нәпақасын табатын, ерен еңбектің адамдары көп. Бірақ көптің ішінде де бірегейлері бар. Табаны күректей 34 жылдан бері кәсібінен нәсіп тапқан,бүгінде маңдай тердің рақатын көріп отырған жан – Жалғасбаев Дайрабай Баймұратұлы бүгінгі әңгімемізге арқау болмақ.Ол өзі түлеп-ұшқан киелі Аманөткел топырағына аянбай еңбек сіңіріп, талай қайырымды істерге ұйытқы болып жүрген нар тұлға.
«Қолы ашықтың – жолы ашық» деген жақсы сөз бар қазақ халқында. Кемел елдің келісті келешегі, ұлағатты болашағы дегенде, ішкен асын жерге қоятын аптал азаматтар жетерлік ортамызда. Асылы, «Байлық – мұрат емес, жоқтық – ұят емес» дейтін қазақ мақалы байлықты мақсат-мұрат санамаған, оны тек басқаға жанашырлық танытып, көмек көрсету мүмкіндігі деп қарайтын жандар жөнінде айтылған ғой.
Еңбек еткенге бақыт басын иеді. Дайрабай Баймұратұлы 1965 жылы қаңтар айының 7-ші жұлдызында дүниеге келген. Ол қазіргі таңда Аманөткел елді мекенінің тұрғыны. Әкесі Жалғасбаев Баймұрат Жалғасбайұлы мен анасы Андақұлова Бәтима Жәдігерқызынан тараған көпбалалы отбасында тәрбиеленген. 1982 жылы орта мектепті бітіріп, 1983 жылы әскери борышын өтеуге аттанады. 1986 жылы туған жерге оралып, еңбек жолын ПМК-4 мекемесіне жүргізуші қызметінен бастаған. Сол жылдары жары Маханова Жәмила Әбілдақызымен кездесіп, отау құрған. Дайрабай Баймұратұлы 1988 жылы мұнай саласына ауысып, оператор қызметіне тағайындалады. 2000 жылдары қиындық туып, қызмет етіп жатқан мекеме ыдырай бастаған соң, қызмет жасау мақсатында, 2001 жылы жеке кәсібін ашып, ауылымыздан жанар жағармай құю бекектін ел игілігіне берді. Қосымша «Баймұрат» шаруа қожалығын ашып түйе, жылқы, сиыр малын өсіріп, өзі осы қожалыққа төрағалық етті.
Қазақ ұғымындағы Атымтай жомарт туралы тәмсілдер де, міне, осындай қолы ашық, жаны жомарт жампоздар жайында сыр шертеді. Ен байлықты еңсеру, оны парасат-пайыммен жұмсау, қасындағыларға қайырымдылықпен қарайласу қанмен келетін қасиет болса керек. Біз тілге тиек етіп отырған Дайрабай Баймұратұлы да «елі ерге қарағанда, ері жерге қарамаған» азаматтың бірі.
Қайырымдылық пен ізгіліктің ұйытқысы болып, аудан көлемінде үлгі көрсетіп жүрген азамат 2018 жылы ауылымыздан «Зере» бөбекжай бақшасын салып, желтоқсан айында пайдалануға берді. Арал ауданында, Аманөткел елді мекенінде жанар жағармай құю бекеттері халыққа үздіксіз қызмет жасауда. Ал өткен жылы Аманөткел ауылдық округіне қарасты, Ақшатау елді мекенінде негізгі мектепті заманауи үлгіде салып, кеше ғана пайдалануға берді. Бұл ғимаратты аймақ басшысы Н.Нәлібаев пен халық қалаулылары салтанатты жағдайда ашып, елдің батасын алды. Өзінің саналы ғұмырында халыққа кәсібімен қалтқысыз қызмет жасап, өмірдің түрлі баспалдақтарынан өтті. Елге жасаған қажырлы қызмет ескерусіз қалмады. Елбасының ҚР Тәуелсіздігінің 20,30 жылдық мерекелерінде төсбелгілерімен, ҚР Сенатының Құрмет грамотасымен, Қазақстан Мәслихаттарының 30 жылдығы мерекесіне орай, өңірдің әлеуметтік-экономикалық дамуына үлесі, ел мүддесі жолында атқарған еңбегі үшін арнайы төсбелгімен және облыс әкімі Нұрлыбек Нәлібаевтың Құрмет грамотасымен марапатталды. Арал аудандық мәслихатының 3 шақырылым депутаты. Жанұяда аяулы жары Жәмиламен 2 ұл, 1 қыз тәрбиелеп өсірді. Балалары Ақниет пен Әділет әке жолын қуып, кәсіпкерлік қызметті абыроймен атқарып жүр. Үлкен келіні Жайнагүл осы кәсіптің есепшісі. Кіші келіні Жұлдыз орта мектепте әлеуметтік педагог.Қызы Ақтоты жолдасы Бауыржанмен Ақтөбе қаласында, әскери салада бірге қызмет атқарады. Сүйікті немерелері Зере, Санжар, Арсен, Бақтияр, Жанайым, Жангүлім, Темірлан, Баянсұлу көз қуаныштары болып өсіп жатыр. «Отбасы шағын мемлекет» демекші ынтымағы жарасқан тату-тәтті қарапайым ғана үлгі тұтарлық бақытты жанұя.