Калифорния штатында алапат өрт шығып, бір қала тұтастай өртеніп кетті

Қазіргі уақытта Калифорнияда 3 ірі өртті ауыздықтау қиынға соғып отыр. Олардың бірі Солтүстік Калифорниядағы өрт штат тарихындағы ең ірісі болды. Жергілікті билік мәліметінше, қызыл жалын 42 мың гектар жерді шарпыған. Тілсіз жау салдарынан 23 адам көз жұмды. Өрт Парадайс қаласы мен қала шетіндегі 7 мыңға жуық құрылыс нысанының тұтастай күл-талқанын шығарды.
Сонымен қатар Оңтүстік Калифорнияда тағы екі өрт орын алды. Олар Лос-Анджелес қаласы мен Вентура округінің аудандарына да жеткен. Олардың біріндн өрт аумағы 28 мың гектар жерді қамтыса, екіншісі 1,8 мың гектарды шарпыды. Қызыл жалына Тынық мұхиты жаққа жайлап, жағалаудағы аудандарға, соның ішінде танымал Малибу курортына қауіп төндіруде.
Штатта төтенше жағдай режимі жарияланды. Өрт сөндірушілердің болжамы бойынша, өрт бақылауға алу үшін 3 аптаға жуық уақыт қажет.

Ал 26 мың тұрғыны бар Парадайс қаласынан мыңдаған адам қауіпсіз жерге көшірілді.
«Қала бос қалып, күл-талқаны шықты», – дейді Калифорнияның орман шаруашылығы және өртке қарсы күрес департаментінің өкілі Скотт Маклин.
Калифорнияда жалпы саны 16 белсенді өрт тіркелді. Штаттың солтүстік бөлігінде дабылдың қызыл дәрежесі жарияланды.