Иран-Израиль қақтығысы шиеленісіп тұр
Таяу Шығыстағы ахуал тағы да ушығып тұр. Иран елі Израильді ұшқышсыз әуе аппараттарымен шабуылдап жатыр. Иран мемлекеттік телеарнасының хабарлауынша, Иран Төңкеріс сарбаздары армиясының шабуыл туралы мәлімдемесінде Израильдің Дамаскідегі Иран консулдығына 1 сәуір күнгі шабуылына қарсы жауап ретінде Иранның Біріккен Ұлттар Ұйымы жарғысының 51-бабына сәйкес өзін-өзі қорғау құқығы аясында Израиль басқыншылығындағы аумақтарда әскери нысандарға операция бастағаны атап көрсетілген.Мәлімдемеде: «Иран өз құқығын қамтамасыз ету және шабуылдаушыны жазалау мақсатында сионистік лаңкестік армияның басып алған жерлердегі маңызды әскери нысандарына шабуыл жасап, оның стратегиялық барлау пункттерін, зымырандар мен пилотсыз әуе көліктерін жойды», деген жолдар бар.
Төңкеріс сарбаздары армиясы АҚШ немесе Израиль атынан кез келген елден келетін қауіп көзіне жауап қайтарылатынын, Иранның заңды мүдделерін түрлі шабуыл және заңсыз күш қолданысына қарсы қорғайтынын ашық білдірді.
IRNA ресми ақпарат агенттігі Төңкеріс сарбаздары армиясының Израильге баллистикалық зымыранмен шабуыл жасағанын мәлімдеген еді. Ал израильдік лауазым иелері болса, Иранның Израильге баллистикалық зымыран ұшырғанын білдіретін ешқандай белгі жоқ екенін айтып отыр. Израиль армиясы елдің оңтүстігінде әскери бір базаға шағын зақым келгенін және адам шығыны болмағанын хабарлады. Армия: «Ираннан Израильге 200-ден астам ұшқышсыз әуе көлігі ұшырылды. Қауіптердің көпшілігі Израильдің әуе кеңістігінен тыс жерде, Сирия және Иордания аумағында ұсталды», деп мәлімдеді.
Премьер-министр Беньямин Нетаньяху бас болып, Тель-Авивке шұғыл жиналған соғыс кабинеті Ираннан жасалған ұшқышсыз әуе көлігі шабуылының жай-жапсарын талқылады. Елдің қауіпсіздік кабинеті Иранның шабуылына тойтарыс беру үшін соғыс кабинетіне жауапкершілік жүктеді.
Иран-Израиль қақтығысы бүкіл әлемді алаңдатып отыр. Онсыз да басылмай келе жатқан Израиль-Палестина дауына қосымша тағы бір соғыс ошағы пайда бола ма деген қауіп зор.
Бұған дейін Иран Израильге қарай ұшқышсыз ұшақтарын ұшырып, Тегеран үстіндегі әуе кеңістігін жауып тастаған болатын. Израиль 1 сәуірде Дамаскідегі Иран консулдығына жасап, салдарынан Иран Ислам революциясы Сақшылар корпусының бірнеше қолбасшысы, оның ішінде екі генерал қаза тапқан еді.
Еуропалық одақтың Сыртқы істер және қауіпсіздік саясаты жөніндегі Жоғарғы өкілі Жозеп Боррель Таяу Шығыстағы жағдайға қатысты қысқаша мәлімдеме жасады. «Еуропалық одақ Иранның Израильге қарсы шабуылын қатаң айыптайды. Бұл – бұрын-соңды болмаған эскалация және аймақтық қауіпсіздікке елеулі қатер», деп жазды еуропалық дипломатияның басшысы.
Еуропалық кеңес басшысы Шарль Мишель де Иранның Израильге шабуылын қатаң айыптады. «Аймақтық шиеленістің одан әрі өршуіне жол бермеу үшін барлығын жасау қажет. Бұдан әрі қантөгіске жол бермеуіміз керек. Біз әріптестерімізбен бірге жағдайды жіті бақылауды жалғастырамыз», деді Ш.Мишель.
Мұндай айыптауларды әлемнің Ұлыбритания, Франция сынды беделді елдерінің сыртқы істер ведомстволары да білдіріп жатыр. Әзірге Израиль, Иран, Иордания, Ливан және Ирактың әуе кеңістігі уақытша жабылды.
Иран мен Израиль қақтығысына орай елімізде «қазақстандық бітімгерлерге қауіп бар ма?» деген сұрақ туындаған рас. Осыған орай Қазақстан Республикасы Қорғаныс министрлігі Голан жоталарындағы қазақстандық бітімгерлер туралы ресми мәлімдеме жасады. Қорғаныс министрлігінің ресми өкілі Руслан Жангулиннің мәлімдеуінше, Голан жоталарында БҰҰ бітімгерлік миссиясын орындап жатқан қазақстандық контингент қалыпты режімде жұмысын жалғастырып жатыр. «Жеке құрамның өмірі мен денсаулығына ешқандай қауіп жоқ», деді Қорғаныс министрлігінің ресми өкілі.
egemen.kz
Фото: egemen.kz
