Газада тағы 38 адам қаза тапты. Арасында балалар да бар

Израильдің соққысынан Газада тағы 38 адам қаза тапты, арасында балалар да бар, деп хабарлайды BAQ.KZ тілшісі Associated Press басылымына сілтеме жасап.

Газадағы денсаулық сақтау өкілдерінің мәліметінше, соңғы 24 сағат ішінде Израильдің әуе шабуылдарынан кемінде 38 адам көз жұмды. Құрбандар арасында балалар да бар. Бұл туралы жексенбі күні жергілікті БАҚ пен ведомстволар хабарлады.

Қазіргі таңда солтүстік Газадағы бірқатар аурухана жарамсыз болып қалғандықтан, нақты мәліметтерді алу мүмкін болмай отыр.

Палестиналық дәрігер жұма күнгі шабуылдан кейін 10 баласының тоғызынан айырылғаны белгілі болды. Бұл жағдай Газа секторындағы гуманитарлық дағдарыстың қаншалықты тереңдеп кеткенін көрсетеді.

Газаның Денсаулық сақтау министрлігі хабарлағандай, биыл наурызда атысты тоқтату режимі бұзылған сәттен бері 3 785 адам қаза тапқан. Израиль бұл әрекетін ХАМАС-ты жою және 2023 жылдың 7 қазанындағы шабуыл кезінде тұтқынға түскен 58 адамды босату мақсатында жүргізіп жатқанын мәлімдеді.

ХАМАС болса, тұтқындарды тек толық бітім мен Израиль әскері Газадан толық шыққан жағдайда ғана босататынын айтып отыр.

Еске салайық, Израиль Газаға екі жарым ай бойы азық-түлік, дәрі-дәрмек және жанармай кіргізуге толықтай тыйым салған. Тек өткен аптада ғана халықаралық қысым мен аштық қаупінен соң шектеулі мөлшерде гуманитарлық көмек жеткізіле бастады.

АҚШ қолдаған жаңа жоспар аясында Израиль Газаға жіберілетін көмекті толық бақылауға алған. Алайда бұл процесті үйлестіріп отырған америкалық маман жексенбі күні отставкаға кетті. Ол өзінің ұйымына тәуелсіз әрекет етуге мүмкіндік берілмейтіні белгілі болғанын айтты.

Фото: baq.kz