Толқын Арал аудандық қоғамдық-саяси газет
» » Карантин: Қызылордада қоғамдық көліктер жүре бастайды

Карантин: Қызылордада қоғамдық көліктер жүре бастайды

Қызылорда қаласында 29 сәуірден бастап қоғамдық көліктер шектеулі уақытпен қайта қатынай бастайды, деп хабарлайды   inform.kz тілшісі.
Қызылорда облыстық Тауарлар мен көрсетілетін қызметтердің сапасы мен қауіпсіздігін бақылау департаментінен мәлім еткендей, бұл – Қызылорда облысының Бас мемлекеттік санитариялық дәрігерінің қаулысы негізінде қабылданып отыр.
Атап айтқанда, облыс орталығында қоғамдық көліктер сағат 06.00-ден 09.00-ге дейін, 18.00-ден 20.00-ге дейін күшейтілген санитарлық-дезинфекциялық режиммен қатынайтын болады. Сондай-ақ Қызылордада балаларға ересектердің ілесіп жүруімен ауладағы ойын алаңдарына сағат 06.00-ден 18.00-ге дейін шығуға рұқсат етілді. Дегенмен, 1,5 метрден кем емес ара-қашықтықты сақтау, медициналық бетперденің болуы міндетті.
65 жастан асқан адамдарға үй аумағынан қашыққа шығуға, саяжайға баруға тыйым салынған.
Штаттық режимде жұмыс жасайтын дәріханаларды қоспағанда, азық-түлік гипермаркеттері, оптомаркеттер, супермаркеттер, минимаркеттер, дүкендер, бірінші кезекте қажетті тауарларды (шаруашылық және гигиеналық тауарлар) сататын нысандар күшейтілген санитарлық-дезинфекциялық режиммен сағат 10.00-ден 20.00-ге дейін жұмыс істейтін болады.
65 жастан асқан адамдарды қоспағанда, жеке басын куәландыратын және саяжай учаскесіне меншік құқығын растайтын құжаттарды көрсете отырып, демалыс және мереке күндері сағат 06.00-ден 18.00-ге дейін саяжайларға барып-келуге рұқсат.
Қала және аудан әкімдігі белгілеген орындарда жеке және заңды тұлғаларға бетперделік режимді және әлеуметтік қашықтықты сақтай отырып (1,5 метрден кем емес) күшейтілген санитарлық-дезинфекциялық режиммен тұқымдарды және көшеттерді сатумен айналысуға болады.
Мейрамханалардың, дәмханалардың, асханалардың және басқа да қоғамдық тамақтану объектілерінің жұмысын «клиенттерге дейін жеткізу» қағидаты бойынша сағат 10.00 ден 22.00 дейін күшейтілген санитарлық-дезинфекциялық режиммен 2020 жылғы 11 мамыр, сағат 00.00-ге дейін рұқсат етіледі.
Естеріңізге сала кетелік, қазір Қызылорда облысында коронавирус диагнозымен 186 адам тіркелген. Оның ішінде 111 адам сырқатынан айықты.
29 сәуір 2020 ж. 159 0