Азат өмірдің айшықты белгісі

Рәміздер – еліміздің дербестігі мен тәуелсіздігін күллі әлемге жария етуші құнды белгілер. Сонау көшпелі дәуірден бері ат төбеліндей елдің басты белгісіне айналып келе жатқан құндылық жайында көп дүниелер айтылады. Негізі, көшпелілір ортасында бір тайпадан екінші тайпа бөлініп шықққанда ең әуелі азан шақырып, ол тайпаның немесе рудың атын қоюмен бірге киелі төрт қанатты туын көтеруі еркіндік пен азат өмірдің айшықты белгісі саналған. Төрткүл дүниені дүбірлетіп ұранын айтып, алты Алашқа паш етіп таңбасын белгілеу дәстүрі де қазақтай жауынгер жұрттың қасиетті құндылығы болған. Ал өзгелер сол таңбаға қарап, ел екенін айыра білген. Бұл дәстүр ұрпақтан-ұрпаққа жалғасып отырған. Қазірдің өзінде тарих жылнамасынан тұғыр алып, ғасырлар үнін ала келген көк тудың азат елдің белгісі ретінде желбіреп тұрғанына 30 жылға жуық уақыт болды. Сол Тумен бірге құрметтелетін Елтаңба мен Әнұранмыз да бар.

Азаттағымызды айшықтап, тәуелсіздігіміздің басты белгісіне айналған осынау мемлекетіміздің төл құжаттары іспеттес нышандарды ұлықтау мақсатында 4 маусым – Қазақстан Республикасының мемлекеттік рәміздер күні болып бекітілген. 1992 жылдың 4 маусымында Қазақстанның жаңа мемлекеттік рәміздері алғаш рет бекітілгендіктен бұл күн қазақ күнтізбесіндегі айтулы мерекеге айналды. Сондықтан болар, бұл күн ел тарихында Мемлекеттік рәміздер күні ретінде мәңгі есте сақталады.
Алаш баласына айбын болып, тәуелсіз тәуелсіздігімізді жаһанға мәлім етіп тұратын құндықтарды қорғау әрбір қазақстандықтың қасиетті парызына айналған. Ендеше елдігімізбен еншілес төл мерекемен барша қазақ халқын құттықтай отырып, халқымыз үшін құнды болған қастерлі рәміздерді бірге қадірлей білуге барша жерлестерді шақырамын. Халықпен бірге ғұмыр кешіп, қазақ жылнамасында алтын әріптермен жазылған қасиетті рәміздердің ғұмыры мәңгілік болғай.
Ғ.Жүсіпова,
Арал көпсалалы колледж мұғалімі.