Елбасы есімін қойған Ерсұлтан
…Осы сәтте Елбасы жанына жақын жеткен Қосжар ауылының ардагері Бақтыбай Шораев:– Нұреке, сіздің келу қарсаңыңызда қуанышты болып жатырмыз. Немеремнің есімін өзіңізге қойдырсам деген ниетпен келдім, – деді.
– Өзіңіздің жас шамаңыз қандай? – деді Президент.
– Қырқыншы жылғымын.
– Бір жылдың төлі екенбіз. Құрдастың немересінің есімі Ерсұлтан болсын!
Содан бері он бес жыл өтті. 2005 жылдың сәуірінде Тұңғыш Президент – Елбасы Нұрсұлтан Назарбаев Сыр еліне жұмыс сапарымен келген болатын. Сол жолы Елбасы Арал қаласындағы Кувейт қорының есебінен қайта жарақтандырылған су құбырын пайдалануға беру рәсіміне қатысып, ардагерлер, тұрғындармен болған кездесуде қалаішілік су тарату желісін өз қолымен ашқан еді. Аралдың экологиялық ахуалы, сол кездегі жағдайы көпке белгілі. Таза судан тапшылық көрген тұрғындар үшін көптен күткен күн туып, мәре-сәре күй кешті.
«Аралға көмек көрсетсем деген арманыма жеткеніме қуаныштымын» деген еді сол сапарында Нұрсұлтан Назарбаев. Өйткені теңізді қайта қалпына келтіру ісі – әлемде бұрын-соңды болмаған жұмыс, ғаламат жоба. Көпшілікпен кездесуінде көп ұзамай «Көкарал» бөгетінің іске қосылып, теңіз суының Аралға жақындайтынын да айтқан болатын.
Сапар кезінде Елбасы Қосжар елді мекеніне келіп, «Қамыстыбас» балық питомнигінің балық өсіру тәсілдерімен, уылдырық шайқау цехының жұмысымен танысты. Ал, тұрғындармен кездесуінде ауыл тұрғыны Бақтыбай Шораевтың өтінішіне орай сол кезде дүние есігін ашқан сәбидің есімін Елбасының өзі қойды.
Сонау жылдардағы басылым беттеріне қарап, он бестегі Ерсұлтанды табу қиын болмады. Ол – қазір Қосжар ауылындағы №67 орта мектептің 10-сынып оқушысы. Алайда, ұлт көшбасшысына ұқсасын деп үміт еткен атасы осыдан алты жыл бұрын өмірден озыпты.
Бүгінде Ерсұлтан мектепте белсенді оқушы. Сөзге шешен, өзі сабырлы жасөспірім көркемсөз оқу байқауларында көзге түсіп жүр.
– Дүниеге келгенімнен-ақ маған үлкен сенім артылды, абыройлы азамат атансын деген ата тілегін сезініп, ержетіп келемін. Есімімді Елбасының қоюы – жақсылықтың нышаны. Мен де болашақта ел тілегін ескерген тұлға болғым келеді. Тұңғыш Президент болу, елдің еңсесін көтеріп, әлемнің алдыңғы қатарлы елдерімен тең ету оңай емес. Тәуелсіз ел атану қиын, тәуелсіздікті сақтап қалу одан да қиын екені белгілі. Отыз жылға жуық уақыт Елбасының көшбасшылығымен бейбіт әрі берекелі күн кешіп келеміз. Мен де тәуелсіздіктің тұғырлы болуы жолында еңбек етемін, – деді Ерсұлтан.
Алдағы уақытта әлем бойынша сұранысқа ие ІТ маманы болуды мақсат еткен Ерсұлтанның биіктен көрінетініне сенімдіміз. Өйткені қазірден-ақ, сөзі нық, арманы биік.
Ал, Аралдың қазіргі жағдайы әлемге белгілі. Кіші Аралдың суға толуы балық қорын молайтып, теңіз жағалаған елдің тұрмысын түзелтті. Бір күндері болашағы бұлыңғыр тартқан ауданның ахуалы адам танымастай өзгерді. Әрине, ғасыр жобасы атанған алпауыт жобаның өмірге келіп, іске асуы Тұңғыш Президенттің тәуекелге толы ерлігі екені анық.
Айдана ЖҰМАДИНОВА
syrboyi.kz
