Аралдықтарға алғысым шексіз

1 наурыз – Қазақстан халқы Ассамблеясы құрылған күн. Бұл күн қос мерекенің қабысқан кезеңі. Шуақты көктемнің алғашқы күні қазақ даласынан қиын шақта пана тапқан барлық этностардың мейірбандылық танытып, адамдарды өз туғанындай қабылдаған қазақтарға алғыс айту күні ретінде атап өтуді дәстүрге айналды. Осы күн бізді бұрынғыдан да жақындастыра түсті. Бұл күн – мейірімділіктің, бүкіл қазақстандықтардың бір-біріне деген достығы мен махаббатының жарқын жарасым тапқан күні. Мемлекеттің ішіндегі ұлтаралық түсіністік, бірлік пен ынтымақ елдің дамуына негізгі себеп болса, ел ішіндегі ұлттар арасындағы татулық, туыстық, достық қатынастар ұлт тұтастығын сақтауда елеулі рөл атқарады.

Кезінде біздің ата-бабаларымыз қазақ еліне түрлі тарихи себептердің негізінде қоныстанған болатын. Сол тұста жергілікті халық мейірбандылықпен оларға елінен орын берді. Мен осында өніп өсіп, қызмет жасап, аралдықтармен туысқан, құда-жекжат болып күн кешіп жатырмын. Жерлестерім маған әркез құрмет көрсетіп келеді. Сол себепті мен өзімді өзге ұлттың өкілі ретінде сезінбеймін.

Жүзі жарқын, жүрегі жомарт қазақ елі. Біздің түріміз бен түп тамырымызға қарап жатпай, өздерінің сый-құрметін көрсетіп келеді.

Құрметті қазақ бауырлар, Сіздер бабалар жалғастығынан қол үзбей, өзге деп өзектен теппей, бізге жарқын құшақ аштыңыздар. Жомарт жүректеріңіздің арқасында біз де ұрпақ өсіріп, қызмет етіп, жайдары тұрмыс кешіп жатырмыз. Тіпті өз ортамызға үйреніп қалғанымыз сонша, ұлтымыздың өзге екенін кейде есімізден шығып кетеді. Мұның бәрі – жергілікті халықтың қамқорлығының арқасы. Осындай шексіз құрметі үшін қазақ халқына алғысымды білдіремін.

Виктор ЧУМАШ,

қала тұрғыны