Ұстазға құрмет
Шұғылалы көктеммен қатар келген ару аналардың мерекесі –Халықаралық әйелдер күніне орай білім саласы қызметкерлері аналарға құрмет көрсетті. Мерекелік шара №62 мектеп-лицейде ұйымдастырылған салтанатты жиынға ардагер ұстаздар қонақ ретінде шақырылды. Осынау көркем мерекенің қай кезде де орны бөлек. Олай болатыны, аналарға деген ыстық сезім, алғыс пен құрмет ешқашан сөнбек емес. Олар – өмірдің гүлі, көңілдің жыры, әр отбасының алтын діңгегі. Мынау тынымсыз тіршілік пен кең дүниенің өзі тек аналармен ажарлы. Соның ішінде ұрпақ тәрбиесімен айналысып, шәкірт тәрбиелеумен қатар, отбасының да берекесін кіргізіп отырған әйелдердің еңбегі тіпті ерек Мерекелік шараға аудандағы мектептерде табанды еңбек етіп, бүгінде зейнет демалысына шыққан 36 ардагер ұстаз арнайы қонақ ретінде қатысты. Кеште сөз алған білім бөлімінің басшысы С.Жанназарова қатысушыларды айтулы мерекемен құттықтады.
– Баршаңызды осынау әсемдікпен астасқан мерекемен шын жүректен құттықтаймын! Сіздер отбасында келін, ана, жар болумен қатар, ұжымда үлгілі әріптес болып, ұрпақ тәрбиесімен айналысып жүрсіздер. Қазіргі күні елдегі қиын жағдайға қарамастан, білім сапасын жетілдіріп, балаларға білім беруде бар күш-жігерлеріңізді салып келесіздер. Сіздердің бұл еңбектеріңіз ешқашан ұмытылмайды. Қазір білім саласында көптеген жаңалықтар болып жатыр. Бұл жетістіктер – ардагер ұстаздардың салып кеткен сара жолының нәтижесі, – деген Санира Нұрқожақызы ардагер ұстаздарға мерекелік сый жасады.
Білім саласы қызметкерлерінің ардагер ұстаздардан қол үзбей үнемі байланыста болып, әрқашан әріптес ретінде аға буын өкілдерін құрмет тұтатындығына ардагер ұстаздар да ризашылығын жеткізді.
Мерекемен Біілім бөлімі басшысының кеңесшісі А.Бөлекбаев, білім беру қызметкерлерінің кәсіподағы аудандық комитетінің төрағасы Ж.Мейірманов құттықтап, жүрекжарды тілектерін білдірді.
Салтанатты шарада мерекелік көңіл күй сыйлайтын әуезді әндер орындалып, ізгі тілектер айтылды.
"Толқын" ақпарат
