Жаңашыл ұстаз
Кез келген маман иесінің білім-білігіне баға берерде «Мұғалімі кім болған екен» деп жатамыз. «Ұстазы жақсының ұстамы жақсы» деген халық даналығында да осы бір қасиетті мамандық иесінің ұрпақ тәрбиесіндегі алар орны ерек екендігін аңғартады. Сондықтан бүгінгі ұстаз шәкіртіне біліммен қатар, мол тәрбие беріп, үлкенге құрмет, кішіге ізет көрсетуді, Отанын сүюді, өз елінің патриоты баулуы керек-ақ. Осы тұрғыда онлайн форматта өткізілген «Үздік тарих пәнінің мұғалімі –2021» облыстық байқауында аудан атынан қатысып, үшінші орын жүлдегері атанған №2 дарынды балаларға арналған мектеп-интернатының тарих пәнінің мұғалімі Гүлбану Кариева әңгімеге арқау болмақ. Әкесі Әзілхан мен анасы Жанар қыздары Гүлбанудың ұстаздық саланы таңдауына қуанып, болашағынан көп үміт күтті. Үміт ақталды деген осы болар. Білім саласында ізденімпаздық пен жаңашылдықты мұрат еткен Гүлбану Әзілханқызы жас өскіндердің оқу-тәрбиесімен айналысудан бойына ерекше күш-қуат алатынын жасырмады. Он бес жылдан бері мектеп-интернатта талмай еңбек етіп келе жатқан ұстаздың бірнеше мәрте еңбегі еленіп, жұмысының жемісін көріп те үлгерді. Ұстаздық жолында оқушылары аудандық, облыстық білім сайыстарында жетістіктерге жетіп, ҚР Білім және ғылым министрлігінің Құрмет грамотасымен марапатталуы осының айқын дәлелі. Шәкірттерінің республикалық деңгейде топ жаруы жолында ұдайы талап үдесінен табылып жүрген мұғалімнің қашанда мақсаты айқын. – Жаңа заманның тарихын жазатын, кезінде бұрмаланған тұстарына баға беретін бүгінгі жас ұрпақ. Шүкір, оқушыларым аудандық, облыстық, республикалық олимпиадалар мен шығармашылық жобалар байқауында жүлделі орындарды иеленіп келеді. Атап айтсам, Тоғжан Бүркітбаева, Жансая Дарханбекқызы, Нұрлыайым Үргенішбаева, Шолпан Нағымет, Құндызай Жасұланқызы сынды басқа да оқушыларыммен мақтанамын. Бұл оқушылардың Абай атамыз айтқандай, білсем, көрсем деп айналадағы жақсы нәрселерге қызығушылығы, талпынысы қуантады. Бұл балалар ертеңгі еліміздің келешегін жасайтын, алдыңғы толқынның ісін жалғастыратын бір-бір тұлғалар. Сондықтан шәкірттердің білім сапасына мән беріп, болашағына деген сенімдерін нығайту – біздің, ұстаздардың міндеті,– дейді Г.Кариева.
Ұстаздар шығармашыл, ізденімпаз, шәкірттерге деген ілтипаты мен берері мол болса, бұл оқушылардың бақыты. Білім саласында айтарлықтай жетістікке жетуіне ең алдымен мамандыққа деген сүйіспеншілігі, адалдығы себепші болса керек.
Аудан, ұжым мерейін асқақтатқан, қызметінде абыройлы ұстаз, отбасында «Күміс алқалы» ана Гүлбану Кариеваның білім жолында алар асуы әлі алда. Алдағы уақытта да білімді де білікті ұстаздың тек биіктерден көрінуіне тілеулеспіз.
К. МАХСҰТ
