Цифрландырудың халыққа қызмет көрсетудегі маңызы

Цифрлық технология – адамзатқа ақпараттарды жылдам тарату, қажетті құжаттарға қолжетімділік мәселелерін шешетін жаңа құрал. Бүгінде тіркеу рәсімдерін жеңілдету, әкімшілік кедергілерді азайту мен қағазбастылықты жою мақсатында қызметтердің басым бөлігі электронды түрде көрсетіледі. «Цифрлық Қазақстан» мемлекеттік бағдарламасы аясында цифрлық технологияларды пайдалану есебінен халықтың өмір сүру сапасын жақсарту – басты мақсат . Қазіргі таңда бұл үрдіс әлеуметтік салада да өзінің оң шешімін табуда.Соның бірі баланың дүниеге келуі әрбір ата-ана үшін айтарлықтай қуанышты және маңызды жағдай. Ата-анаға баланы дүниеге әкелумен қатар оларға жаңа міндеттер мен құқықтар жүктеледі. Ата-ана міндеттеріне тоқталар болсақ, ең алғашқы міндеті – баланың тууын толық тіркету. Баланың тууын тіркету үшін баланың туған жері бойынша немесе ата-анасының не олардың біреуінің тұрғылықты жері бойынша e.gov.kz электрондық үкімет порталы арқылы өтініштерін білдіре алады. Баланың тууы туралы өтінішті оның ата-анасы тіркеуші органдарға ол туған күннен бастап үш тәуліктен кешіктірмей беруге тиіс.
Туу туралы куәлікті алу үшін арнайы мекемелерді жағалап, уақыт кетірмейсіз. Ешқайда бармай-ақ, перзентхананың өзінен SMS-ке жауап беру арқылы құжат тапсыруға болады. Құжат тапсырылған кезде бір реттік құпиясөз ұялы телефоныңызға келеді. Бір реттік құпиясөз дегеніміз азамат белгілі бір қызметті алу үшін сұрау салған кезде СМС арқылы ұялы телефонға келетін хабарлама. Сұрау салушының телефонына келген тексеруші құпиясөзді  e.gov.kz порталында енгізу қажет. Осы кезде пайдаланушының нөмірі мобильдік азаматтар базасында тексеріліп, базадағы нөмірмен сәйкестігі расталып, сұрау салған қызметке бірден жауап беріледі. Мобильдік азаматтар базасында тіркелу үшін порталда «Жеке кабинетке» кіріп, «телефон» деген бағанада ұялы телефонның нөмірін көрсету қажет.
Алыс ауылдарда тұратын аналар көбіне қалаға келіп босанатыны белгілі. Олар баланың құжатын бірден ала алмайтыны анық. Сол үшін босанар алдында өздерінің ұялы телефондарынның нөмірлерін e.gov.kz электрондық үкімет порталына тіркетіп алса, ешқандай қиындықтар туындамасы анық. Себебі ана босанғаннан бастап перзентхана қызметкері нәрестенің дүниеге келуін электронды жүйеге тіркеген сәттен ұялы телефонына SMS хабарлама арқылы құттықтау жіберіліп, туу туралы куәлік алуға ұсыныс түседі. Сол кезде ата-ана ұялы телефоны арқылы келген SMS -ке жауап беріп (баланың аты-жөнін жазады) құжаттың дайын болу жөніндегі SMS жауабын күтеді. Дайын болған құжатты аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінен (Бақтыбай батыр №58 үй, 2 қабат, 4 кабинет) келіп алады.
Айта кетерлік тағы бір жайт, туу, неке қию туралы қайталама куәліктерді де электрондық үкімет порталы (e.gov.kz) арқылы тапсырып, тез арада уақыт жоғалтпай алуға болады.
Алдағы уақытта электронды үкіметті (e.gov.kz веб-порталы) насихаттау жұмыстары одан әрі жалғасын табатын болса, тұтынушылар санының артатыны анық.

Е. ДАБЫЛОВА,
Арал аудандық жұмыспен қамту, әлеуметтік бағдарламалар және азаматтық
хал актілерін тіркеу бөлімінің бас маманы