Қыс - 2021: Дайындық өз деңгейінде
Осы аптада «Қазақавтожол» ЖШС №49 жол пайдалану бөлімшесінің ауласында төтенше жағдайлардың алдын алу және оларды жою және азаматтық қорғау мемлекеттік жүйесін одан әрі жетілдіру, сондай-ақ қысқы кезеңдегі төтенше жағдайларға басқару органдарын, азаматтық қорғаудың күштері мен құралдарын дайындау мақсатында «Қыс-2021» республикалық командалық-штабтық оқу-жаттығуы өткізілді. Оқу-жаттығу басшысы болып Арал ауданы әкімінің орынбасары Е.Әбішев, оқу-жаттығудың басқару штабының басшысы болып Арал ауданының Төтенше жағдайлар бөлімінің бастығы Д. Шакен тағайындалған.Қысқы кезеңде төтенше жағдайлардың алдын алу және жою жөніндегі іс-қимылдарға АҚМЖ-ның басқару органдары мен күштерін дайындау тақырыбында өткен оқу жаттығуға аудан әкімі Серік Сермағамбетов қатысып, аудан деңгейінде төтенше жағдай орын алған кезде оны жоюға жұмылдырылатын азаматтық қорғау қызметтері мен құрылымдардың әзірлігін тексерді.Аудан әкімі алдымен инженерлік қызметтің әлеуетін бақылады, техникаларымен танысып, қысқа дайындығын бағамдады. Қыс мезгілінде көрсетілетін қызметтерге дайын құрылымдар қатарында бұдан бөлек сауда және тамақтандыру қызметі, жанар-жағармай, жануарларды және өсімдіктерді қорғау қызметі, энергетика мен жедел жәрдем, радиоциялық-химиялық қорғаныс қызметі, құлақтандыру және байланыс, су қызметі, КазТрансГаз және полиция қызметі мен төтенше жағдай және өрт сөндіру қызметтері бар. Бұл құрылымдардың барлығы аудан әкіміне қысқа дайын екендіктерін баяндады.
Көлік магистральдары мен тыныс-тіршілікті қамтамасыз ету объектілерінің жұмыс істеуі бұзылған жағдайда өздеріне бағынысты күштерді басқару бойынша АҚМЖ салалық және аумақтық кіші жүйелердің жұмысында үйлесімділікті жетілдіруге күш салатын құрылымдарға артылар жуапкершілік зор екені түсінікті. Бұл ретте сенім үдесінен шығуға жұмыс жасайтындығын айтқан оқу-жаттығудың басшысы Е.Әбішев, қысқа әзірліктің жай-күйі жіті бақылауда болатынын жеткізді.«Қыс-2021» республикалық командалық-штабтық оқу-жаттығудың соңында аудан әкімі барлық құрылымдардың өкілдерін қай уақытта болмасын көмекке дайын болуға шақырды. Әсіресе қыс мезгілінде бізді не күтіп тұрғанын бағамдау қиын екендігін айтып, азаматтық қорғау қызметі мен құрылымдардың жұмысына сәттілік тіледі.
«Толқын» ақпарат.
