Ел-жұрт алаңдаған, көңілге қаяу түсірген кешегі жағдай бейбіт, тыныш өмірден асқан бақыт жоқ екенін тағы бір ұғындырды. Өз талабын айтып, бейбіт шеруге шыққан тұрғындар бастамасының соңы лаңкестік, озбырлық әрекетке ұласты. Тұтқиылдан болған бұл жағдайдан ел абдырап қалды. Айдың-күннің аманында елдегі тәртіпсіздіктер салдарынан қаншама бейбіт тұрғындар зардап шегіп, көз жұмғандар да болды. Қаншама ішкі істер саласы қызметкерлері мен Отан қорғаушы сарбаздар халықтың қауіпсіздігі және еліміздің болашағы үшін жандарын құрбан етті. Олар өмірінің соңына дейін антына адалдық танытты. Әскери және қызметтік міндетін орындау кезінде қаза тапқан жандардың батырлығы, мемлекет мүддесін қорғау кезінде көрсеткен ерліктері ел жадында мәңгі сақталары сөзсіз. Жалпыұлттық аза тұту күнінде мемлекеттің көк туының төмен түсуі еңсемізді басып, көңілімізге мұң ұялатты. Осындай қиын сәтте Мемлекет басшысы Қасым-Жомарт Тоқаевтың халықты сабырға шақырып, нақты шешімдер қабылдауы көптің ертеңге деген сенімін ұлғайтты.

"Отан отбасынан  басталады" деп тегін айтылмаған. Отан алдындағы жауапкершілікті сезінуді әрбір әке үйінде өсіп келе жатқан ұрпағына ұғындыру керек. Отбасында балаларын Отанды сүюге баулуда, патриоттық рухта тәрбиелеуде әкенің рөлі зор. Барлық әкелерге айтарым, ұлдарымызды алдымен ата-анасын сыйлауды, жақындарына, апа-қарындастарына қамқор болуды үйретуге шақырамын. Өйткені кешегі бұзақылардың ішінде өзіміздің қазақтың балалары аяусыз бірін-бірі ұрып-соғып, үлкен-кіші демей қасақана кісі өлтіруі, озбырлық көрсетуі отбасындағы тәрбиенің осалдығынан деп түсінемін. Бізге бір-бірімізге деген мейірімділік пен сүйіспеншілік жетіспейтін сыңайлы. Ненің дұрыс, ненің бұрыс екенін үйінде әкесі айтып, жөнге салып отырса, жағдай ушықпас еді.